ਲੈ ਬਈ, ਗੱਜਣਵਾਲੇ, ਮੋਠੂਓ, ਸਤ ਸ਼੍ਰੀ ਅਕਾਲ। ਪੰਜਾਬੀਆਂ ਨੂੰ ਸਾਲ ਭਰ ਚੋਂ ਸਭ ਤੋਂ ਜਿਆਦਾ ਧਿਆਨ ਕਣਕ ਉੱਤੇ ਹੁੰਦਾ ਹੈ। ਸੋਕਾ, ਡੋਬਾ, ਕੋਰਾ, ਝੱਖੜ, ਗੜੇ ਅਤੇ ਹੋਰ ਸੌ ਉਲਝਣਾਂਚੋਂ ਲੰਘ, ਮਸਾਂ ਹੀ ਕਿਤੇ, ਸਾਲ ਭਰ ਦੇ ਦਾਣੇ, ਭੜੋਲੇ ਵਿੱਚ ਪੈਂਦੇ ਹਨ। ਪਹਿਲਾਂ ਠੰਡ ਅਤੇ ਹੁਣ ਲੂ-ਗਰਮੀ ਨੇ ਕੇਰਾਂ ਈ ਘੁਮਾ ਤੀਂਆਂ ਕੰਪੈਨਾਂ। ਸਾਰੀ ਮਸ਼ੀਨਰੀ ਦੇ ਜੋੜ-ਖੋਲ, ਗਰੀਸਾਂ ਦੇ, ਫੋਰਮੈਨ ਤਿਆਰੀ ਕਰੀ ਬੈਠੇ ਸਨ। ਹੱਲਾ ਕਰਨ ਆਂਗੂੰ ਜੁੱਟ ਪੇ। ਜਿੱਥੇ ਪੜ੍ਹੇ-ਲਿਖੇ ਅਤੇ ਸਰਦੇ ਲੋਕ ਠੰਡੇ ਕਮਰਿਆਂਚੋਂ ਨਿਕਲ, ਠੰਡੀ ਕਾਰ ਚ ਵੜ, ਠੰਡੇ ਹਾਲਚ ਦੁੱਖ-ਸੁੱਖ ਕਰਦੇ, ਖਾਂਦੇ-ਪੀਂਦੇ ਵੀ ਤ੍ਰਾਹੀ-ਤ੍ਰਾਹੀ ਕਰੀ ਜਾਂਦੇ ਐ, ਉੱਥੇ ਕਿਸਾਨ-ਮਜ਼ਦੂਰ ਏਸੇ, ਤਰਤਾਲੀ ਡਿਗਰੀ ਚ, ਜਵਾਕਾਂ ਨੂੰ ਨਾਲ ਲਾ, ਟੱਬਰ-ਟੀਰ ਦਾ ਸਾਲ-ਭਰ ਦਾ, ਅੰਨ-ਜਮ੍ਹਾਂ ਕਰਨ ਲਈ ਲਟੋ-ਪੀਂਘ ਹੋਏ ਪਏ ਐ। ਮੂੰਹ ਸਿਰ ਬੰਨ੍ਹ, ਕੰਡ-ਫੱਕ ਨਾਲ, ਦੋ-ਚਾਰ ਹੁੰਦਾ ਲਾਣਾ, ਕਣਕ ਵੱਢਣ, ਕੱਢਣ, ਸਿਲਾ ਚੁਗਣ, ਮੰਡੀਚ ਸਿੱਟਣ, ਵੇਚਣ ਅਤੇ ਤੂੜੀ-ਤੰਦ ਸਾਂਭਣ ਲਈ ਦਿਨ-ਰਾਤ ਇੱਕ ਕਰੀ ਜਾਂਦੈ।

ਸਰਕਾਰੀ ਅਮਲਾ-ਫੈਲਾ ਵੀ ਘੁਕੀ ਜਾਂਦੈ। ਸਕੂਲੀ ਪੜ੍ਹਦੇ ਪਾੜੂ ਵੀ ਮਾਂ-ਬਾਪ ਨਾਲ ਤੌੜੇ-ਲੋਟਾਂ ਚੱਕੀ, ਸਦੇਹਾਂ ਹੀ ਖੇਤਾਂ ਵੱਲ ਚਾਲੇ ਪਾ ਦਿੰਦੇ ਐ। ਮੀਂਹ-ਹਨੇਰੀ ਦੀ ਬਿੜਕ ਲੈਂਦੇ, ਥੱਕੇ-ਟੁੱਟੇ ਜੀਅ-ਜੰਤ, ਇੱਕ-ਦੂਜੇ ਵੱਲ, ਵਾਰ-ਵਾਰ ਦੇਖਦੇ, ਫੇਰ ਜੁੱਟ ਪੈਂਦੇ ਹਨ। ਕਣਕ ਦਾ ਹੋਈਆ, ਚੰਗਾ ਐਤਕੀਂ, ਪੈਂਹਟ-ਅਠਾਹਟ ਮਣ ਨਿਕਲ ਰਹੀ ਹੈ, ਰਿਕਾਰਡ ਟੁੱਟਣ ਨਾਲ ਕਈਆਂ ਦੇ ਕਬੀਲਦਾਰੀ ਦੁੱਖ ਵੀ ਟੁੱਟਣਗੇ। ਖੇਤੀ ਵਾਲਿਆਂ ਦੀ ਸਰਕਾਰ ਨਾ ਸਹੀ, ਰੱਬ ਤਾਂ ਵੇਖਦਾ ਈ ਨਾ! ਕਈ ਰੇਲੂ ਅਰਗੇ ਵੇਹਲੜ ਵੀ, ਜਿਹੜੇ ਸਾਰਾ ਸਾਲ ਡੱਕਾ ਨੀਂ ਤੋੜਦੇ, ਆਵਦੇ ਪਾਂਜੀਏ ਭਾਈ ਮੇਲੂ ਨਾਲ ਦਾਤੀ ਚੁੱਕ ਗੇੜਾ ਦੇਈ ਜਾਂਦੇ ਐ। ਖਹਿਰਾ ਸਾਹਿਬ, ਮੇਲੂ ਨੂੰ ਪੰਜਵੇਂ ਹਿੱਸੇ ਉੱਤੇ ਜ਼ਮੀਨ ਦੇ ਕੇ ਪਹਿਲਾਂ, ਕਾਰਮਦਾ ਕਿ ਕਣਕ ਦਾਤੀ ਨਾਲ ਵੱਢ ਕੇ ਤੂੜੀ ਹੜੰਬੇ ਜਾਂ ਡਰੰਮੀ ਨਾਲ ਕੱਢਣੀਂ ਐ। ਲਵੇਰੀਆਂ ਦੇ ਪ੍ਰੇਮੀ ਖੁਸ਼ਵੰਤ ਖੈਹਰਾ ਦੱਸਦਾ ਹੁੰਦੈ, ਬਈ, “ਹੱਥ ਦੀ ਵਾਢੀ ਨਾਲ ਬਣੀ, ਤੂੜੀ ਨੂੰ ਪਸੂ ਚਾਅ ਨਾਲ ਖਾਂਦੇ ਐ। ਖੁਸ਼ ਹੋ ਕੇ ਪਸੂ ਦੁੱਧ ਵੱਧ ਦਿੰਦੇ ਐ। ਫਸਲ ਅਤੇ ਪਸੂਆਂ ਦੀ ਨਸਲ, ਨਾਲ ਹੀ ਕਿਸਾਨ-ਮਜਦੂਰ ਦੀ ਸਿਹਤ ਜੁੜੀ ਹੋਈ ਐ। ਚੰਗੀ ਮਿਹਨਤ ਅਤੇ ਖੁਰਾਕ ਕਰਕੇ ਹੀ ਨੱਬੇ ਸਾਲ ਵਾਲਾ ਖੰਗੂਰਾ ਮਾਰ ਸਕਦੈ।” ਆਪਣੇ ਵੇਲਿਆਂ ਚ, ਵਿੱਘਾ ਹਾੜ੍ਹੀ ਵੱਢਣ ਵਾਲਾ ਗੇਬੀ ਲੂਰ੍ਹੀਆਂ ਲੈਂਦਾ ਆਖਦਾ, “ਦੋ-ਦੋ ਕਿੱਲਿਆਂ ਆਲੇ ਵੀ ਕੰਪੈਨ ਤੋਂ ਵਢਾਈ ਜਾਂਦੇ ਐ, ਨਾ ਤੂੜੀ ਬਣੇ ਨਾ ਪੂਰੇ ਦਾਣੇ। ਐਨ੍ਹੀਂ ਕੁ ਤਾਂ ਮੈਂ ਚਾਰ-ਪੰਜ ਦਿਨ੍ਹਾਂਚ ਕੱਲ੍ਹੇ ਨੇ ਈ ਚਾਅਚ ਵੱਢ ਦੇਣੀਂ ਸੀ। ਸਾਡੇ ਵੇਲੇ ਅਸੀਂ ਵੀੜ੍ਹੀ ਕਰਕੇ ਮਹੀਨਾ-ਡੂਢ ਮਹੀਨਾ ਘਰੇ ਈ ਨੀਂ ਸੀ ਵੜਦੇ। ਲਾਂਗਾ, ਤੰਗਲੀਆਂ, ਸੈਂਡ, ਛੱਜਲੀਆਂ ਅਤੇ ਕੁੱਪਾਂ ਨਾਲ ਹੀ ਵਾਹ ਪੈਂਦਾ ਸੀ। ਚੱਲੋ ਭਾਈ ਜੇਹੀ ਕੋਕੋ ਓਹ ਜੇ ਜੋਕੋ?" ਸ਼ਾਮ ਲਾਲ ਵਪਾਰੀ ਦੀ ਗੱਲ ਠੀਕ ਹੈ, “ਏਸ ਸੋਨੇ ਰੰਗੇ ਅਨਾਜ ਤੋਂ, ਨੌਤੀ ਸੌ ਸ਼ੈਆਂ ਬਣਦੀਆਂ ਹਨ, ਜਿਨ੍ਹਾਂ ਨੇ ਕੋਤਰ ਸੌ ਜਨੌਰਾਂ, ਪੰਛੀਆਂ, ਵਾਪਾਰੀਆਂ, ਕਾਰਖਾਨੇਦਾਰਾਂ, ਟਰੱਕਾਂ ਵਾਲੇ, ਦੁਕਾਨਦਾਰਾਂ ਅਤੇ ਸਰਕਾਰਾਂ ਦਾ ਸਾਲ ਭਰ ਪਹੀਆ ਚੱਲਦਾ ਰੱਖਣਾ ਹੈ।" ਅੰਨ ਹੀ ਮੂਲ ਹੈ, ਜਿੰਦਗੀ ਦਾ ਆਧਾਰ ਹੈ, ਸ਼ਾਲਾ ਇਹ ਕਾਇਮ ਰਹੇ, ਸਾਰੀ ਦੁਨੀਆਂਤੇ। ਆਮੀਨ।

ਤੁਹਾਡਾ ਆਪਣਾ,
(ਡਾ.) ਸਰਵਜੀਤ ਸਿੰਘ ‘ਕੁੰਡਲ`
ਗਲੀ ਨੰ. 07, ਮਾਡਲ ਟਾਊਨ, ਅਬੋਹਰ-152116, ਪੰਜਾਬ (ਭਾਰਤ)
ਮੋਬਾਈਲ ਨੰ. 9464667061

ਬਲਵਿੰਦਰ ਸਿੰਘ ਭੁੱਲਰ
ਬੀਤੇ ਦਿਨੀਂ ਸ੍ਰੋਮਣੀ ਅਕਾਲੀ ਦਲ ਦੇ ਡੈਲੀਗੇਟ ਇਜਲਾਸ ਰਾਹੀਂ ਸ੍ਰ: ਸੁਖਬੀਰ ਸਿੰਘ ਬਾਦਲ ਨੂੰ ਮੁੜ ਦਲ ਦਾ ਪ੍ਰਧਾਨ ਚੁਣ ਲਿਆ ਗਿਆ ਹੈ। ਇਸ ਬਾਰੇ ਪਹਿਲਾਂ ਹੀ ਸਭ ਲੋਕ ਭਲੀਭਾਂਤ ਜਾਣਦੇ ਸਨ, ਕਿ ਉਹਨਾਂ ਨੂੰ ਹੀ ਪ੍ਰਧਾਨ ਚੁਣਿਆ ਜਾਵੇਗਾ, ਉਹੀ ਹੋ ਗਿਆ ਹੈ। ਪਰ ਸੁਆਲ ਉੱਠਦਾ ਹੈ ਕਿ ਸ੍ਰ: ਬਾਦਲ ਦੇ ਪ੍ਰਧਾਨ ਬਣਨ ਨਾਲ ਸ੍ਰੋਮਣੀ ਅਕਾਲੀ ਦਲ ਦਾ ਅੰਦਰਲਾ ਕਾਟੋ ਕਲੇਸ ਖਤਮ ਹੋ ਜਾਵੇਗਾ? ਕੀ ਖੇਤਰੀ ਪਾਰਟੀ ਸ੍ਰੋਮਣੀ ਅਕਾਲੀ ਦਲ ਮਜਬੂਤ ਹੋਵੇਗਾ? ਕੀ ਪੰਜਾਬ ਦੇ ਲੋਕ ਸੁਖਬੀਰ ਬਾਦਲ ਨੂੰ ਪ੍ਰਧਾਨ ਵਜੋਂ ਕਬੂਲ ਕਰ ਲੈਣਗੇ? ਕੀ ਸੁਖਬੀਰ ਬਾਦਲ ਲੋਕਾਂ ਦੀਆਂ ਆਸਾਂ ਉਮੀਦਾਂ ਤੇ ਖ਼ਰਾ ਉੱਤਰ ਸਕੇਗਾ? ਅਜਿਹੇ ਅਨੇਕਾਂ ਸੁਆਲ ਹਨ ਜੋ ਅੱਜ ਹਰ ਹੱਟੀ ਭੱਠੀ, ਗਲੀਆਂ ਬਜ਼ਾਰਾਂ ਵਿੱਚ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ।
ਮੁੜ ਪ੍ਰਧਾਨ ਬਣ ਜਾਣ ਤੇ ਸ੍ਰ: ਸੁਖਬੀਰ ਸਿੰਘ ਬਾਦਲ ਬੜੇ ਹੌਂਸਲੇ ਵਿੱਚ ਵਿਖਾਈ ਦੇ ਰਹੇ ਹਨ ਅਤੇ ਉਹਨਾਂ ਦੇ ਚਹੇਤੇ ਤਾਂ ਅਗਲੀ ਸਰਕਾਰ ਵੀ ਅਕਾਲੀ ਦਲ ਦੀ ਵੇਖਣ ਲੱਗ ਪਏ ਹਨ। ਪਰ ਅਸਲ ਪੱਖੋਂ ਵੇਖਿਆ ਜਾਵੇ ਤਾਂ ਸ੍ਰ: ਬਾਦਲ ਲਈ ਚਣੌਤੀਆਂ ਪਹਿਲਾਂ ਨਾਲੋਂ ਘਟੀਆਂ ਨਹੀਂ ਸਗੋਂ ਵਧ ਗਈਆਂ ਹਨ। ਜਦੋਂ ਅਕਾਲੀ ਸਰਕਾਰ ਦੌਰਾਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਬੇਅਦਬੀਆਂ ਹੋਈਆਂ, ਉਸ ਸਮੇਂ ਤੋਂ ਸ੍ਰੋਮਣੀ ਅਕਾਲੀ ਦਲ ਦੀ ਗਿਰਾਵਟ ਸੁਰੂ ਹੋ ਗਈ ਸੀ ਅਤੇ ਪੰਜਾਬ ਵਿੱਚ ਉਸ ਸਮੇਂ ਤੋਂ ਬਾਅਦ ਹੋਈਆਂ ਸਾਰੀਆਂ ਚੋਣਾਂ ਵਿੱਚ ਅਕਾਲੀ ਦਲ ਨੂੰ ਬੁਰੀ ਹਾਰ ਦਾ ਮੂੰਹ ਵੇਖਣਾ ਪਿਆ। ਸੱਤਰ ਸੱਤਰ ਅੱਸੀ ਅੱਸੀ ਸੀਟਾਂ ਜਿੱਤਣ ਵਾਲਾ ਅਕਾਲੀ ਦਲ ਦੋ ਤਿੰਨ ਤੱਕ ਸਿਮਟ ਕੇ ਰਹਿ ਗਿਆ। ਪੰਜਾਬ ਦੇ ਲੋਕ ਸ੍ਰੋਮਣੀ ਅਕਾਲੀ ਦਲ ਸਰਕਾਰ ਅਤੇ ਬਾਦਲ ਪਰਿਵਾਰ ਨੂੰ ਇਹਨਾਂ ਘਿਨਾਉਣੀਆਂ ਘਟਨਾਵਾਂ ਪ੍ਰਤੀ ਜੁਮਵਾਰ ਮੰਨਦੇ ਹਨ। ਸ੍ਰ: ਪ੍ਰਕਾਸ ਸਿੰਘ ਬਾਦਲ ਅਤੇ ਸ੍ਰ: ਸੁਖਬੀਰ ਸਿੰਘ ਬਾਦਲ ਨੇ ਖ਼ੁਦ ਅਤੇ ਸੱਤਾ ਦਾ ਲਾਭ ਲੈਣ ਵਾਲੇ ਉਹਨਾਂ ਦੇ ਨਜਦੀਕੀਆਂ ਨੇ ਵਥੇਰੀਆਂ ਸਫ਼ਾਈਆਂ ਦਿੱਤੀਆਂ, ਪਰ ਲੋਕਾਂ ਨੇ ਉਹਨਾਂ ਤੇ ਵਿਸ਼ਵਾਸ਼ ਨਾ ਕੀਤਾ। ਅੱਜ ਤੱਕ ਅਕਾਲੀ ਦਲ ਮੁੜ ਪੈਰਾਂ ਸਿਰ ਖੜਾ ਨਹੀਂ ਹੋ ਸਕਿਆ।

ਦਲ ਨੂੰ ਮਜਬੂਤ ਕਰਨ ਲਈ ਅਤੇ ਪਾਰਟੀ ਦੀ ਮੁੜ ਸੁਰਜੀਤੀ ਲਈ ਕੁੱਝ ਅਕਾਲੀ ਆਗੂਆਂ ਨੇ ਬਾਗੀਪੁਣਾ ਵਿਖਾ ਕੇ ਬਾਦਲ ਪਰਿਵਾਰ ਨੂੰ ਪਾਰਟੀ ਦੇ ਅਹੁਦਿਆਂ ਤੋਂ ਲਾਂਭੇ ਹੋ ਜਾਣ ਲਈ ਅਪੀਲਾਂ ਕੀਤੀਆਂ। ਜਿਹਨਾਂ ਨੂੰ ਅਸਵਿਕਾਰ ਕਰਦਿਆਂ ਸ੍ਰ: ਸੁਖਬੀਰ ਸਿੰਘ ਬਾਦਲ ਨੇ ਪ੍ਰਧਾਨਗੀ ਛੱਡਣ ਤੋਂ ਕੋਰਾ ਜਵਾਬ ਦੇ ਦਿੱਤਾ। ਪੰਜਾਬ ਦੇ ਲੋਕ ਇਸ ਖੇਤਰੀ ਪਾਰਟੀ ਦੀ ਮਜਬੂਤੀ ਦੇ ਹੱਕ ਵਿੱਚ ਸਨ, ਇਸ ਕਰਕੇ ਪਾਰਟੀ ਤੋਂ ਬਾਹਰਲੇ ਬੁੱਧੀਜੀਵੀ ਲੋਕਾਂ ਨੇ ਵੀ ਸ੍ਰ: ਬਾਦਲ ਨੂੰ ਪਾਸੇ ਹੋ ਜਾਣ ਦੇ ਸੁਝਾਅ ਦਿੱਤੇ। ਪਰ ਸੁਖਬੀਰ ਸਿੰਘ ਬਾਦਲ ਇਸ ਕਦਰ ਡਰੇ ਹੋਏ ਸਨ ਕਿ ਜੇਕਰ ਇੱਕ ਵਾਰ ਹੱਥ ਪੋਲਾ ਕਰ ਦਿੱਤਾ ਤਾਂ ਮੁੜ ਕਿਸੇ ਨੇ ਪ੍ਰਧਾਨਗੀ ਦੇ ਨੇੜੇ ਫੜਕਣ ਵੀ ਨਹੀਂ ਦੇਣਾ। ਇਸ ਕਰਕੇ ਉਹਨਾਂ ਮਨ ਬਣਾ ਲਿਆ ਕਿ ਭਾਵੇਂ ਉਹ ਇਕੱਲੇ ਰਹਿ ਜਾਣ ਪ੍ਰਧਾਨਗੀ ਨਹੀਂ ਛੱਡਣਗੇ।

ਬਾਦਲ ਪਰਿਵਾਰ ਦੇ ਵਿਰੋਧੀ ਧੜੇ ਵੱਲੋਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੱਕ ਪਹੁੰਚ ਕਰਨ ਤੇ ਸਥਿਤੀ ਕਾਫ਼ੀ ਨਾਜੁਕ ਬਣ ਗਈ। ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਸੱਦਣ ਤੇ ਸ੍ਰ: ਸੁਖਬੀਰ ਸਿੰਘ ਬਾਦਲ ਕਸੂਤੀ ਸਥਿਤੀ ਵਿੱਚ ਫਸ ਗਏ, ਬੇਅਦਬੀਆਂ ਤੇ ਹੋਰ ਗੁਨਾਹਾਂ ਸਬੰਧੀ ਪੇਸ਼ ਹੋਣ ਲਈ ਪ੍ਰਧਾਨ ਦੀ ਹੈਸੀਅਤ ਵਿੱਚ ਜਾਇਆ ਨਹੀਂ ਜਾ ਸਕਦਾ ਸੀ। ਇਸ ਲਈ ਉਹਨਾਂ ਆਪਣੇ ਪਰਿਵਾਰ ਦੇ ਦਹਾਕਿਆਂ ਤੋਂ ਵਫ਼ਾਦਾਰ ਰਹੇ ਸ੍ਰ: ਬਲਵਿੰਦਰ ਸਿੰਘ ਭੂੰਦੜ ਨੂੰ ਕਾਰਜਕਾਰੀ ਪ੍ਰਧਾਨ ਬਣਾ ਕੇ ਖ਼ੁਦ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਪੇਸ਼ ਹੋਏ ਅਤੇ ਸਾਰੇ ਗੁਨਾਹਾਂ ਨੂੰ ਕਬੂਲ ਵੀ ਕਰ ਲਿਆ। ਪੰਜ ਸਿੰਘ ਸਾਹਿਬਾਨਾਂ ਨੇ ਸ੍ਰ: ਸੁਖਬੀਰ ਸਿੰਘ ਬਾਦਲ ਅਤੇ ਅਕਾਲੀ ਸਰਕਾਰ ਸਮੇਂ ਉਹਨਾਂ ਦਾ ਸਹਿਯੋਗ ਦੇਣ ਵਾਲੇ ਕਈ ਆਗੂਆਂ ਨੂੰ ਧਾਰਮਿਕ ਸਜ਼ਾਵਾਂ ਸੁਣਾਈਆਂ।

ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਵੀ ਚਾਹੁੰਦੇ ਸਨ ਕਿ ਸ੍ਰੋਮਣੀ ਅਕਾਲੀ ਦਲ ਜਿਸਨੂੰ ਪੰਥਕ ਪਾਰਟੀ ਕਿਹਾ ਜਾਂਦਾ ਹੈ ਮਜਬੂਤ ਹੋਵੇ ਅਤੇ ਪੰਜਾਬ ਦੀ ਅਗਵਾਈ ਕਰੇ। ਪੰਜ ਸਿੰਘ ਸਾਹਿਬਾਨਾਂ ਨੇ ਇਸ ਸਬੰਧੀ ਸੱਤ ਮੈਂਬਰੀ ਕਮੇਟੀ ਕਾਇਮ ਕਰਦਿਆਂ, ਸਹੀ ਤੇ ਸਪਸ਼ਟ ਢੰਗ ਨਾਲ ਸ੍ਰੋਮਣੀ ਅਕਾਲੀ ਦੀ ਨਵੀਂ ਭਰਤੀ ਕਰਨ ਦੇ ਆਦੇਸ਼ ਦਿੱਤੇ। ਸ੍ਰ: ਬਾਦਲ ਸਮਝਦੇ ਸਨ ਕਿ ਜੇਕਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਹੁਕਮਾਂ ਅਨੁਸਾਰ ਭਰਤੀ ਕੀਤੀ ਗਈ ਤਾਂ ਉਹਨਾਂ ਦੇ ਹੱਥ ਪ੍ਰਧਾਨਗੀ ਨਹੀਂ ਆਵੇਗੀ। ਉਹਨਾਂ ਹੁਕਮਾਂ ਦੀ ਪਰਵਾਹ ਨਾ ਕਰਦਿਆਂ ਵੱਖਰੇ ਤੌਰ ਤੇ ਭਰਤੀ ਅਰੰਭ ਦਿੱਤੀ ਅਤੇ ਜਿਸ ਤਰਾਂ ਭਰਤੀ ਕੀਤੀ ਗਈ ਉਹ ਸਭ ਲੋਕ ਭਲੀਭਾਂਤ ਜਾਣਦੇ ਹਨ। ਉਹਨਾਂ ਵਿੱਚੋਂ ਹੀ ਡੈਲੀਗੇਟ ਚੁਣ ਕੇ ਸਰਵਸੰਮਤੀ ਵਿਖਾਉਂਦਿਆਂ ਸ੍ਰ: ਸੁਖਬੀਰ ਸਿੰਘ ਬਾਦਲ ਨੂੰ ਮੁੜ ਪ੍ਰਧਾਨ ਚੁਣੇ ਜਾਣ ਦਾ ਐਲਾਨ ਕਰ ਦਿੱਤਾ ਗਿਆ। ਇਹ ਸਾਰਾ ਕੰਮ ਏਨੇ ਵਿਸਵਾਸ਼ ਨਾਲ ਕੀਤਾ ਗਿਆ ਕਿ ਵਿਸਾਖੀ ਦਿਹਾੜੇ ਤੇ ਹੋਣ ਵਾਲੀ ਅਕਾਲੀ ਕਾਨਫਰੰਸ ਵਿੱਚ ਪਹੁੰਚਣ ਲਈ ਬਣੇ ਪ੍ਰੋਗਰਾਮ ਵਾਲੇ ਰਸਤੇ ਤੇ ਸ੍ਰ: ਬਾਦਲ ਦੇ ਪ੍ਰਧਾਨ ਬਣ ਤੋਂ ਪਹਿਲਾਂ ਹੀ ਨਵੇਂ ਪ੍ਰਧਾਨ ਚੁਣੇ ਜਾਣ ਦੀ ਵਧਾਈ ਦੇ ਬੋਰਡ ਵੀ ਲਾ ਦਿੱਤੇ ਗਏ ਸਨ।

ਦੂਜੇ ਪਾਸੇ ਬਾਦਲ ਵਿਰੋਧੀ ਧੜੇ ਵੱਲੋਂ ਅਜੇ ਵੀ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਆਦੇਸ਼ ਅਨੁਸਾਰ ਭਰਤੀ ਕੀਤੀ ਜਾ ਰਹੀ ਹੈ, ਜੋ ਲੋਕਾਂ ਦੇ ਸਾਹਮਣੇ, ਆਧਾਰ ਕਾਰਡ ਲੈ ਕੇ ਅਤੇ ਫਾਰਮਾਂ ਤੇ ਦਸਤਖਤ ਕਰਵਾ ਕੇ ਕੀਤੀ ਜਾ ਰਹੀ ਹੈ। ਇਸ ਧੜੇ ਨੂੰ ਚੰਗਾ ਭਰਵਾਂ ਹੁੰਗਾਰਾ ਵੀ ਮਿਲ ਰਿਹਾ ਹੈ। ਪਰ ਇਹ ਧੜਾ ਕੋਈ ਵੱਖਰੀ ਪਾਰਟੀ ਦੀ ਭਰਤੀ ਨਹੀਂ ਕਰ ਰਿਹਾ, ਬਲਕਿ ਸ੍ਰੋਮਣੀ ਅਕਾਲੀ ਦਲ ਦੀ ਭਰਤੀ ਹੀ ਕਰ ਰਿਹਾ ਹੈ। ਸ੍ਰ: ਸੁਖਬੀਰ ਸਿੰਘ ਬਾਦਲ ਨੇ ਇਸ ਭਰਤੀ ਨੂੰ ਰੋਕਣ ਲਈ ਸੱਤ ਮੈਂਬਰੀ ਕਮੇਟੀ ਦੇ ਦੋਂ ਮੈਂਬਰਾਂ ਤੇ ਵੀ ਕਮੇਟੀ ਛੱਡ ਦੇਣ ਲਈ ਦਬਾਅ ਬਣਾਇਆ, ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਨੂੰ ਵੀ ਵਰਤਿਆ। ਤਿੰਨ ਸਿੰਘ ਸਾਹਿਬਾਨਾਂ ਦੀ ਛੁੱਟੀ ਵੀ ਕਰਵਾ ਦਿੱਤੀ, ਇੱਕ ਸਿੰਘ ਸਾਹਿਬਾਨ ਦੀ ਕਿਰਦਾਰਕਸ਼ੀ ਵੀ ਕੀਤੀ ਗਈ। ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਮਰਯਾਦਾ ਨੂੰ ਅੱਖੋਂ ਪਰੋਖੇ ਕੀਤਾ, ਸਿਧਾਂਤਾਂ ਨੂੰ ਸੱਟ ਮਾਰੀ ਗਈ। ਪਰ ਫੇਰ ਵੀ ਵਿਰੋਧੀ ਧੜੇ ਵੱਲੋਂ ਕੀਤੀ ਜਾ ਰਹੀ ਭਰਤੀ ਨੂੰ ਰੋਕਿਆ ਨਹੀਂ ਜਾ ਸਕਿਆ। ਹਾਲਾਤ ਇੱਥੋਂ ਤੱਕ ਪਹੁੰਚ ਗਏ ਕਿ ਸਿੱਖ ਪੰਥ ਦੇ ਸਭ ਤੋਂ ਉੱਚੇ ਅਹੁਦੇ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਨਵੇਂ ਨਿਯੁਕਤ ਸਿੰਘ ਸਾਹਿਬਾਨ ਨੂੰ ਇੱਕ ਸਮਾਗਮ ਵਿੱਚ ਪ੍ਰਬੰਧਕਾਂ ਨੇ ਜਥੇਦਾਰ ਮੰਨਣ ਤੋਂ ਇਨਕਾਰ ਕਰਦਿਆਂ ਸਿਰੋਪਾ ਲੈਣ ਤੋਂ ਹੀ ਇਨਕਾਰ ਕਰ ਦਿੱਤਾ ਗਿਆ। ਇੱਕ ਜਥੇਦਾਰ ਤੇ ਦਰਜ ਮੁਕੱਦਮਿਆਂ ਦਾ ਹਵਾਲਾ ਦੇ ਕੇ ਨਿਯੁਕਤੀ ਤੇ ਸੁਆਲ ਉਠਾਏ ਗਏ।

ਏਨੇ ਸਭ ਕੁੱਝ ਹੋਣ ਦੇ ਬਾਵਜੂਦ ਸ੍ਰ: ਸੁਖਬੀਰ ਸਿੰਘ ਪ੍ਰਧਾਨ ਬਣ ਗਏ। ਪ੍ਰਧਾਨ ਬਣਨ ਉਪਰੰਤ ਉਹਨਾਂ ਦਮਦਮਾ ਸਾਹਿਬ ਤਲਵੰਡੀ ਸਾਬੋ ਵਿਖੇ ਆਪਣੀ ਪਹਿਲੀ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਲੋਕਾਂ ਨੂੰ ਸਰਕਾਰ ਬਣਨ ਤੇ ਸਹੂਲਤਾਂ ਦੇਣ ਦੇ ਲਾਲਚ ਦੇਣ ਦਾ ਵਿਖਾਵਾ ਕੀਤਾ। ਅਕਾਲੀ ਦਲ ਦੇ ਸਾਰੇ ਲੀਡਰਾਂ ਨੂੰ ਇੱਕਮੁੱਠ ਹੋਣ ਦੀ ਅਪੀਲ ਵੀ ਕੀਤੀ। ਪਰ ਇਹ ਕਾਨਫਰੰਸ ਉਮੀਦਾਂ ਅਨੁਸਾਰ ਭਰਵੀਂ ਨਹੀਂ ਸੀ ਅਤੇ ਨਾ ਹੀ ਲੋਕਾਂ ਵਿੱਚ ਉਤਸ਼ਾਹ ਸੀ। ਵਰਕਰਾਂ ਦੇ ਕਹਿਣ ਤੇ ਲੋਕ ਪਹੁੰਚੇ ਜਰੂਰ ਸਨ, ਪਰ ਦੀਵਾਨ ਹਾਲ ਵੀ ਖਚਾਖਚ ਭਰਿਆ ਹੋਇਆ ਨਹੀਂ ਸੀ, ਜਦੋਂ ਸਮੁੱਚੀ ਲੀਡਰਸ਼ਿਪ ਸੰਬੋਧਨ ਕਰ ਰਹੀ ਸੀ, ਹਾਲ ਵਿੱਚ ਲੋਕ ਸੁੱਤੇ ਵੀ ਪਏ ਸਨ। ਨਾਅਰੇ ਦਾ ਜਵਾਬ ਵੀ ਲੀਡਰਾਂ ਦੀ ਉਮੀਦ ਅਨੁਸਾਰ ਨਹੀਂ ਮਿਲ ਰਿਹਾ ਸੀ, ਵਾਰ ਵਾਰ ਕਹਿ ਕੇ ਨਾਅਰੇ ਲਵਾਉਣੇ ਪੈ ਰਹੇ ਸਨ। ਪਹੁੰਚੇ ਹੋਏ ਵਰਕਰਾਂ ਲੋਕਾਂ ਦੇ ਮਨਾਂ ਵਿੱਚ ਗੁੱਸਾ ਅਜੇ ਸਾਂਤ ਨਹੀਂ ਸੀ ਹੋਇਆ। ਜੋ ਪੰਡਾਲ ਚੋਂ ਉੱਠ ਕੇ ਬਾਹਰ ਜਾਂਦੇ ਉਹ ਕਈ ਤਰਾਂ ਰੋਸ ਵਿਖਾ ਰਹੇ ਸਨ।

ਪਹਿਲਾਂ ਕੇਵਲ ਬੇਅਦਬੀਆਂ ਦੇ ਦੋਸ਼ਾਂ ਸਦਕਾ ਹੀ ਅਕਾਲੀ ਦਲ ਬਹੁਤ ਹੇਠਾਂ ਚਲਿਆ ਗਿਆ ਸੀ ਅਤੇ ਬਾਦਲ ਪਰਿਵਾਰ ਦਾ ਡਟਵਾਂ ਵਿਰੋਧ ਹੁੰਦਾ ਰਿਹਾ ਸੀ। ਹੁਣ ਪ੍ਰਧਾਨਗੀ ਹਾਸਲ ਕਰਨ ਲਈ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਮਰਯਾਦਾ ਤੇ ਸਿਧਾਂਤਾਂ ਨੂੰ ਸੱਟ ਮਾਰਨ ਅਤੇ ਸਿੰਘ ਸਾਹਿਬਾਨਾਂ ਦੀ ਕੀਤੀ ਕਿਰਦਾਰਕੁਸ਼ੀ ਅਤੇ ਧੱਕੇ ਨਾਲ ਇਹਨਾਂ ਪਵਿੱਤਰ ਤੇ ਮਹਾਨ ਅਹੁਦਿਆਂ ਤੋਂ ਚੌਕੀਦਾਰਾਂ ਵਾਂਗ ਲਾਹ ਕੇ ਘਰ ਤੋਰ ਦੇਣ ਤੋਂ ਪੰਜਾਬ ਦੇ ਲੋਕ ਖਾਸ ਕਰਕੇ ਸਿੱਖ ਜਿਆਦਾ ਗੁੱਸੇ ਵਿੱਚ ਵਿਖਾਈ ਦੇ ਰਹੇ ਹਨ। ਨਾ ਅਜੇ ਬੇਅਦਬੀਆਂ ਦੇ ਦਾਗ ਧੋਤੇ ਜਾ ਚੁੱਕੇ ਹਨ ਅਤੇ ਨਾ ਹੀ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਹੁਕਮਾਂ ਤੋ ਆਕੀ ਹੋਣਾ ਚੰਗਾ ਸਮਝਿਆ ਜਾ ਰਿਹਾ ਹੈ।

ਸ੍ਰ: ਸੁਖਬੀਰ ਸਿੰਘ ਬਾਦਲ ਇਹਨਾਂ ਹਾਲਾਤਾਂ ਨੂੰ ਕਾਬੂ ਕਿਵੇਂ ਕਰਨਗੇ? ਲੋਕਾਂ ਵਿੱਚ ਵਿਸਵਾਸ਼ ਕਿਵੇਂ ਪੈਦਾ ਕਰਨਗੇ? ਇਹਨਾਂ ਸੁਆਲਾਂ ਦੇ ਜੁਆਬ ਤਾਂ ਭਵਿੱਖ ਦੇ ਗਰਭ ਵਿੱਚ ਹਨ। ਪਰ ਸ੍ਰ: ਬਾਦਲ ਲਈ ਇਹ ਪ੍ਰਧਾਨਗੀ ਅਜੇ ਕੰਡਿਆਂ ਦਾ ਰਾਹ ਹੈ, ਐਨਾ ਸੌਖਾ ਕੰਮ ਨਹੀਂ ਜਿਨਾਂ ਉਹ ਸਮਝ ਰਹੇ ਹਨ।

ਮੋਬਾ: 098882 75913

ਬਲਵਿੰਦਰ ਸਿੰਘ ਭੁੱਲਰ
ਹਜ਼ਾਰਾਂ ਸਾਲ ਪਹਿਲਾਂ ਮਨੁੱਖ ਜੰਗਲਾਂ ਵਿੱਚ ਜਾਨਵਰਾਂ ਵਾਂਗ ਰਹਿੰਦਾ ਸੀ। ਜਦੋਂ ਮਨੁੱਖ ਨੂੰ ਕੁੱਝ ਸੋਝੀ ਆਈ ਤਾਂ ਉਸਨੇ ਜਾਨਵਰਾਂ ਦੀ ਤਰਾਂ ਜਿੰਦਗੀ ਜਿਉਣ ਦੀ ਬਜਾਏ ਖਾਣ ਪੀਣ, ਰਹਿਣ ਵੱਲ ਉਚੇਚਾ ਧਿਆਨ ਦਿੱਤਾ। ਇਸ ਉਪਰੰਤ ਉਸਨੇ ਜੀਵਨ ਜਿਉਣ ਲਈ ਲੋੜੀਂਦੀਆਂ ਵਸਤਾਂ ਵਾਲੀ ਜਗਾਹ ਦੀ ਪਛਾਣ ਕਰਕੇ ਉੱਥੇ ਸਥਾਈ ਤੌਰ ਤੇ ਰਹਿਣਾ ਸੁਰੂ ਕੀਤਾ। ਪਹਿਲਾਂ ਖੱਡਾਂ, ਫੇਰ ਝੌਪੜੀਆਂ, ਇਸਤੋਂ ਬਾਅਦ ਪਿੰਡ ਅਤੇ ਫੇਰ ਸੁੰਦਰ ਸ਼ਹਿਰ ਹੋਂਦ ਵਿੱਚ ਆ ਗਏ। ਇਹ ਵੀ ਸੱਚਾਈ ਹੈ ਕਿ ਜਦੋਂ ਮਨੁੱਖ ਨੇ ਇੱਕ ਥਾਂ ਉੱਤੇ ਰਹਿਣਾ ਸੁਰੂ ਕੀਤਾ, ਉਸ ਸਮੇਂ ਤੋਂ ਹੀ ਜਗਾਹ ਤੇ ਕਬਜਾ ਕਰਨ ਅਤੇ ਵੰਡਾਰਾ ਕਰਨ ਦੀ ਪ੍ਰਕਿਰਿਆ ਵੀ ਸੁਰੂ ਹੋ ਗਈ। ਇਸ ਵੰਡ ਨਾਲ ਦੇਸ਼ਾਂ, ਸ਼ਹਿਰਾਂ, ਪਿੰਡਾਂ ਦੀਆਂ ਹੱਦਾਂ ਹੋਂਦ ਵਿੱਚ ਆਈਆਂ। ਅਨੇਕਾਂ ਨਵੇਂ ਦੇਸ਼ ਬਣ ਗਏ, ਸ਼ਹਿਰਾਂ ਵਿੱਚ ਬਸਤੀਆਂ ਤੇ ਪਿੰਡਾਂ ਵਿੱਚ ਪੱਤੀਆਂ ਹੋਂਦ ਵਿੱਚ ਆ ਗਈਆਂ। ਜਦੋਂ ਇੱਕ ਦੇਸ਼ ਤੋਂ ਵੰਡ ਕਰਕੇ ਦੋ ਦੇਸ਼ ਬਣਦੇ ਤਾਂ ਅਜਿਹੇ ਮੌਕੇ ਮਨੁੱਖਤਾ ਦਾ ਘਾਣ ਹੁੰਦਾ ਰਿਹਾ। ਭਾਰਤ ਨਾਲੋਂ ਵੱਖ ਹੋ ਕੇ ਪਾਕਿਸਤਾਨ ਬਣਨ ਵੇਲੇ ਬਿ੍ਰਟਿਸ਼ ਸਰਕਾਰ ਵੱਲੋਂ ਤਿਆਰ ਕਰਵਾਈ ਰੈੱਡਕਲਿੱਫ ਲਾਈਨ ਨੇ ਸਰਹੱਦ ਬਣਾਈ। ਇਸ ਨੂੰ ਆਧਾਰ ਬਣਾ ਕੇ ਕੀਤੀ ਵੰਡ ਸਮੇਂ ਲੱਖਾਂ ਲੋਕ ਮਾਰੇ ਤੇ ਉਜਾੜੇ ਗਏ। ਅੰਗਰੇਜ ਇਹ ਰੇਖਾ ਖਿੱਚ ਕੇ ਤੁਰਦੇ ਬਣੇ, ਪਰ ਕਰੀਬ ਸੱਤ ਦਹਾਕਿਆਂ ਤੋਂ ਵੱਧ ਸਮਾਂ ਹੋਣ ਤੇ ਬਾਵਜੂਦ ਵੀ ਜਦ ਇਹ ਰੇਖਾ ਨਜਰੀਂ ਪੈਂਦੀ ਹੈ ਤਾਂ ਅੰਗਰੇਜਾਂ ਪ੍ਰਤੀ ਗੁੱਸਾ ਪੈਦਾ ਹੋ ਜਾਂਦਾ ਹੈ ਅਤੇ ਵੰਡਾਰੇ ਸਦਕਾ ਮਨ ਉਦਾਸ ਹੋ ਜਾਂਦਾ ਹੈ। ਇਹ ਵੰਡ ਧਰਮਾਂ ਦੇ ਆਧਾਰ ਤੇ ਕਰਵਾਈ ਸੀ, ਜਿਸ ਸਦਕਾ ਗੁੱਸਾ ਤੇ ਉਦਾਸੀ ਹੋਣੀ ਜਾਇਜ਼ ਹੈ, ਪਰ ਸਬਰ ਹੀ ਕਰਨਾ ਪੈਂਦਾ ਹੈ।

ਦੇਸ਼ਾਂ ਦੀ ਬਜਾਏ ਜੇਕਰ ਪਿੰਡਾਂ ਦੇ ਹਾਲਾਤਾਂ ਦੀ ਗੱਲ ਕਰੀਏ, ਜੇ ਭਰਾ ਭਰਾ ਅੱਡ ਹੋਣ ਸਮੇਂ ਘਰਾਂ ਦਾ ਵੰਡਾਰਾ ਸਹਿਮਤੀ ਨਾਲ ਕਰਨ ਤਾਂ ਰਸਨਾ ਬਣੀ ਰਹਿੰਦੀ ਹੈ ਅਤੇ ਲੋਕ ਵੀ ਸਲਾਘਾ ਕਰਦੇ ਹਨ। ਜੇਕਰ ਇਹ ਵੰਡਾਰਾ ਗੁੱਸੇ ਨਾਲ ਕੀਤਾ ਜਾਵੇ ਤਾਂ ਬਾਪ ਦਾਦੇ ਵੱਲੋਂ ਮਿਹਨਤ ਤੇ ਸ਼ੌਕ ਨਾਲ ਬਣਾਏ ਘਰਾਂ ਦੇ ਵਿਚਾਲੇ ਕੰਧ ਕੱਢ ਕੇ ਬਜੁਰਗਾਂ ਦੀ ਸੋਚ ਨੂੰ ਤਬਾਹ ਕਰ ਦਿੱਤਾ ਜਾਂਦਾ ਹੈ। ਪੁਰਾਣੇ ਘਰਾਂ ਦੇ ਮੂਹਰਲੇ ਪਾਸੇ ਇੱਕ ਸ਼ਾਨਦਾਰ ਦਰਵਾਜਾ ਹੋਇਆ ਕਰਦਾ ਸੀ, ਜੋ ਬਹੁਤ ਅਰਾਮਦਾਇਕ ਤੇ ਪਰਿਵਾਰ ਦੀ ਇੱਕਮੁੱਠਤਾ ਅਤੇ ਚੰਗੀ ਮਾਲੀ ਹਾਲਤ ਦਾ ਸਬੂਤ ਹੁੰਦਾ ਸੀ। ਇਹ ਦਰਵਾਜਾ ਘਰ ਦੀ ਸੁਰੱਖਿਆ ਵੀ ਪ੍ਰਦਾਨ ਕਰਦਾ ਸੀ, ਕਿਉਂਕਿ ਘਰ ਆਉਣ ਵਾਲਾ ਵਿਅਕਤੀ ਇੱਥੇ ਹੀ ਗੱਲਬਾਤ ਕਰਕੇ ਵਾਪਸ ਹੋ ਜਾਂਦਾ ਸੀ। ਬਹੁਤ ਖਾਸ ਜਾਂ ਰਿਸਤੇਦਾਰ ਹੀ ਦਰਵਾਜਾ ਲੰਘ ਕੇ ਸਭਾਤਾਂ ਤੱਕ ਪਹੁੰਚ ਸਕਦਾ ਸੀ।

ਪਿੰਡਾਂ ਵਿੱਚ ਮੌਜੂਦਾ ਸਮੇਂ ਭਰਾਵਾਂ ਦੇ ਹੋਣ ਵਾਲੇ ਵੰਡਾਰੇ ਨੇ ਇਹਨਾਂ ਦਰਵਾਜਿਆਂ ਨੂੰ ਵੀ ਦੋ ਭਾਗਾਂ ਵਿੱਚ ਵੰਡ ਦਿੱਤਾ ਹੈ, ਵਿਚਾਲੇ ਕੰਧ ਕੱਢ ਕੇ ਦਰਵਾਜਿਆਂ ਦੀ ਸ਼ਾਨ ਵਿਗਾੜੀ ਜਾਣ ਲੱਗੀ ਹੈ। ਇਹ ਵੰਡ ਕਰਨ ਵਾਲੀ ਚੰਦਰੀ ਕੰਧ ਦਰਵਾਜੇ ਦੇ ਅੰਦਰ ਕੱਢ ਕੇ ਪਰਦਾ ਵੀ ਨਹੀਂ ਰੱਖਿਆ ਜਾਂਦਾ ਅਤੇ ਦਰਵਾਜੇ ਦੇ ਤਖ਼ਤੇ ਵੀ ਵੰਡੇ ਵਿਖਾਈ ਦਿੰਦੇ ਹਨ। ਕੰਧ ਬਾਹਰ ਵਿਖਾਈ ਦਿੰਦੀ ਹੈ, ਜੋ ਗੁੱਸੇ ਨਾਲ ਹੋਏ ਵੰਡਾਰੇ ਦੀ ਸ਼ਾਹਦੀ ਭਰਦੀ ਹੈ। ਚੰਗੀ ਸੋਚ ਵਾਲੇ ਇਨਸਾਨ ਨੂੰ ਇਹ ਕੰਧ ਭਾਰਤ ਪਾਕ ਨੂੰ ਵੰਡਣ ਵਾਲੀ ਰੈੱਡਕਲਿੱਫ ਰੇਖਾ ਨਾਲੋਂ ਵੀ ਬੁਰੀ ਲਗਦੀ ਹੈ, ਕਿਉਂਕਿ ਇਹ ਸਕੇ ਭਰਾਵਾਂ ਵੱਲੋਂ ਕੀਤੀ ਬਜੁਰਗਾਂ ਦੀ ਸੋਚ ਤੇ ਉਮੀਦਾਂ ਨੂੰ ਵੰਡਦੀ ਹੈ।

ਲੋੜ ਹੈ ਭਰਾਵੀਂ ਵੰਡ ਗੁੱਸੇ ਦੀ ਬਜਾਏ ਵਡੇਰੇ ਬਜੁਰਗਾਂ ਦੀ ਸੋਚ ਨੂੰ ਸਾਹਮਣੇ ਰੱਖ ਕੇ ਕੀਤੀ ਜਾਵੇ। ਭਰਾਵਾਂ ਦਾ ਅੱਡ ਅੱਡ ਹੋਣਾ ਕੁਦਰਤੀ ਵਰਤਾਰਾ ਹੈ ਜਿਸਨੂੰ ਫ਼ਰਜ ਸਮਝ ਕੇ ਕਰਨਾ ਚਾਹੀਦਾ ਹੈ। ਇਸ ਵਿੱਚੋਂ ਖੁਸ਼ੀ ਦਾ ਪ੍ਰਗਟਾਵਾ ਹੋਣਾ ਚਾਹੀਦਾ ਹੈ ਗੁੱਸੇ ਜਾਂ ਦੁਸਮਣੀ ਦੀ ਭਾਵਨਾ ਨੂੰ ਪ੍ਰਗਟ ਨਹੀਂ ਹੋਣ ਦੇਣਾ ਚਾਹੀਦਾ, ਤਾਂ ਜੋ ਸਮਾਂ ਪਾ ਕੇ ਮੁੜ ਕਦੇ ਆਪਣਿਆਂ ਨਾਲ ਮੋਹ ਪਿਆਰ ਉਜਾਗਰ ਕਰ ਦੇਵੇ।

ਮੋਬਾ: 098882 75913

ਔਕਲੈਂਡ 16 ਅਪ੍ਰੈਲ 2025 (ਹਰਜਿੰਦਰ ਸਿੰਘ ਬਸਿਆਲਾ)-ਮਾਲਵਾ ਸਪੋਰਟਸ ਐਂਡ ਕਲਚਰਲ ਕਲੱਬ ਨਿਊਜ਼ੀਲੈਂਡ ਵੱਲੋਂ 31 ਮਈ ਦਿਨ ਸ਼ਨੀਵਾਰ ਨੂੰ ਡਿਊ ਡ੍ਰਾਪ ਈਵੈਂਟ ਸੈਂਟਰ ਮੈਨੁਕਾਓ ਵਿਖੇ ਸ਼ਾਮ 6 ਵਜੇ ਤੋਂ ਦੇਰ ਰਾਤ ਤੱਕ ‘ਫੁੱਲਕਾਰੀ ਲੇਡੀਜ਼ ਨਾਈਟ’ ਕਰਵਾਈ ਜਾ ਰਹੀ ਹੈ। ਅੱਜ ਇਸ ਸਬੰਧੀ ਰੰਗਦਾਰ ਪੋਸਟਰ ਲਵ ਪੰਜਾਬ ਰੈਸਟੋਰੈਂਟ ਮੈਨੁਰੇਵਾ ਵਿਖੇ ਮਾਲਵਾ ਕਲੱਬ ਦੀਆਂ ਮਹਿਲਾ ਮੈਂਬਰਜ਼ ਦੇ ਵੱਲੋਂ ਪੰਜਾਬੀ ਬੋਲੀਆਂ ਪਾ ਕੇ ਕੀਤਾ ਗਿਆ। ਸਿਰਫ਼ ਮਹਿਲਾਵਾਂ ਦੇ ਲਈ ਰਾਖਵੇਂ ਇਸ ਸਭਿਆਚਾਰਕ ਪ੍ਰੋਗਰਾਮ ਦੇ ਲਈ ਕੋਈ ਦਾਖਲਾ ਫੀਸ ਨਹੀਂ ਹੁੰਦੀ, ਨਾ ਹੀ ਕੋਈ ਪਾਰਕਿੰਗ ਫੀਸ ਹੁੰਦੀ ਹੈ। ਛੋਟੀਆਂ ਬੱਚੀਆਂ ਤੋਂ ਲੈ ਕੇ ਬਜ਼ੁਰਗ ਮਾਤਾਵਾਂ ਵੀ ਇਥੇ ਮਨ ਪ੍ਰਚਾਵੇ ਲਈ ਅਤੇ ਪੁਰਾਣੀਆਂ-ਨਵੀਂਆਂ ਰਵਾਇਤੀ ਪੰਜਾਬੀ ਗੀਤ-ਸੰਗੀਤ ਲਈ ਪਹੁੰਚਦੀਆਂ ਹਨ। ਨਿਊਜ਼ੀਲੈਂਡ ਵਸਦੀਆਂ ਸਮੂਹ ਮਹਿਲਾਵਾਂ ਨੂੰ ਅਪੀਲ ਕੀਤੀ ਗਈ ਕਿ ਇਸ ਦਿਨ ਸਾਰੀਆਂ ਮਹਿਲਾਵਾਂ ਪੰਜਾਬੀ ਸੂਟ, ਲਹਿੰਗੇ ਅਤੇ ਹੋਰ ਖਾਸ ਰਵਾਇਤੀ ਕੱਪੜੇ ਪਹਿਨ ਕੇ ਆਉਣ।

ਫੁੱਲਕਾਰੀ ਨਾਈਟ ਦੇ ਨਾਲ-ਨਾਲ ਇਥੇ ਦੇਸੀ ਬਾਜ਼ਾਰ ਵੀ ਲੱਗੇਗਾ ਜਿਸ ਦੇ ਵਿਚ ਬਹੁਤ ਸਾਰੀਆਂ ਖਾਣ-ਪੀਣ ਦੀਆਂ ਦੁਕਾਨਾਂ, ਸੂਟਾਂ ਦੀਆਂ ਦੁਕਾਨਾਂ ਅਤੇ ਹੋਰ ਖਰੀਦੋ-ਫਰੋਖਤ ਲਈ ਸਜ਼ਾਵਟੀ ਸਮਾਨ ਦੀਆਂ ਦੁਕਾਨਾਂ ਸਜਣਗੀਆਂ। ਜਿਆਦਾ ਜਾਣਕਾਰੀ ਲਈ ਪ੍ਰਧਾਨ ਸ. ਪਰਮਿੰਦਰ ਸਿੰਘ ਤੱਖਰ, ਉਪ ਪ੍ਰਧਾਨ ਪਾਲ ਰਣੀਆ, ਸਕੱਤਰ ਗਗਨ ਧਾਲੀਵਾਲ ਅਤੇ ਸਭਿਆਚਾਰਕ ਪੈਰੀ ਭੁੱਲਰ ਨਾਲ ਦਿੱਤੇ ਫੋਨ ਨੰਬਰਾਂ ਉਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।

ਨਿਊਯਾਰਕ, 16 ਅਪ੍ਰੈਲ (ਰਾਜ ਗੋਗਨਾ )- ਬੀਤੇਂ ਦਿਨ ਅਮਰੀਕਾ ਦੇ ਨਿਊਯਾਰਕ ਦੇ ਕੋਲੰਬੀਆ ਕਾਉਂਟੀ ਵਿੱਚ ਬੀਤੇ ਦਿਨ ਰਾਤ ਨੂੰ ਇੱਕ ਦੋ ਇੰਜਣਾਂ ਵਾਲਾ ਜਹਾਜ਼ ਇੱਕ ਚਿੱਕੜ ਭਰੇ ਖੇਤ ਵਿੱਚ ਹਾਦਸਾਗ੍ਰਸਤ ਹੋ ਗਿਆ ਸੀ। ਇਸ ਘਟਨਾ ਵਿੱਚ ਮਾਰੇ ਗਏ ਛੇ ਲੋਕਾਂ ਵਿੱਚ ਇੱਕ ਭਾਰਤੀ ਮੂਲ ਦੀ ਇੱਕ ਮਹਿਲਾ ਡਾਕਟਰ ਵੀ ਸ਼ਾਮਲ ਸੀ। ਅਤੇ ਇਕ ਭਾਰਤੀ ਜੋਏ ਸੈਣੀ ਇੱਕ ਮਸ਼ਹੂਰ ਸਰਜਨ ਦੀ ਵੀ ਮੋਤ ਹੋ ਗਈ ਸੀ।ਇਸ ਘਟਨਾ ਵਿੱਚ ਉਸਦੇ ਨਾਲ, ਉਸ ਦੇ ਪਤੀ, ਧੀ, ਪੁੱਤਰ, ਅਤੇ ਉਸਦੇ ਸਾਥੀ ਅਤੇ ਉਸਦੀ ਧੀ ਦੇ ਬੁਆਏਫ੍ਰੈਂਡ ਦੀ ਵੀ ਮੌਤ ਹੋ ਗਈ।ਨਿਊਯਾਰਕ ਵਿੱਚ ਹੋਏ ਜਹਾਜ਼ ਹਾਦਸੇ ਵਿੱਚ ਪੰਜਾਬ ਵਿੱਚ ਜਨਮੀ ਮਹਿਲਾ ਡਾਕਟਰ ਵੀ ਸਮੇਤ ਇਸ ਹਾਦਸੇ ਵਿੱਚ ਉਸ ਦੇ ਪਤੀ, ਧੀ ਅਤੇ ਪੁੱਤਰ ਦੀ ਵੀ ਮੌਤ ਹੋ ਗਈ।ਇਹ ਪਰਿਵਾਰ ਜਨਮਦਿਨ ਮਨਾਉਣ ਅਤੇ ਛੁੱਟੀਆਂ ਦਾ ਆਨੰਦ ਲੈਣ ਜਾ ਰਿਹਾ ਸੀ ਜਦੋਂ ਇਹ ਹਾਦਸਾ ਵਾਪਰਿਆ ਇਸ ਜਹਾਜ਼ ਹਾਦਸੇ ਵਿੱਚ ਮਾਰੇ ਗਏ ਲੋਕਾਂ ਦੀ ਪਛਾਣ ਐਮਆਈਟੀ ਫੁੱਟਬਾਲ ਖਿਡਾਰੀ ਕਰੀਨਾ ਗ੍ਰੋਫ, ਉਸਦੇ ਪਿਤਾ ਡਾ. ਮਾਈਕਲ ਗ੍ਰੋਫ, ਉਸ ਦੀ ਮਾਂ, ਡਾ. ਜੋਏ ਸੈਣੀ, ਉਸਦਾ ਭਰਾ ਜੈਰੇਡ ਗ੍ਰੋਫ, ਅਤੇ ਉਸਦੇ ਭਰਾ ਦੀ ਸਾਥੀ ਅਲੈਕਸੀਆ ਕੋਯੋਟ ਡੁਆਰਟੇ ਅਤੇ ਕਰੀਨਾ ਦੇ ਬੁਆਏਫ੍ਰੈਂਡ ਜੇਮਸ ਸੈਂਟੋਰੋ ਵਜੋਂ ਕੀਤੀ ਹੈ। ਇਹ ਹਾਦਸਾ ਉਦੋਂ ਵਾਪਰਿਆ ਜਦੋਂ ਇਹ ਲੋਕ ਜਨਮਦਿਨ ਮਨਾਉਣ ਅਤੇ ਛੁੱਟੀਆਂ ਮਨਾਉਣ ਲਈ ਕੈਟਸਕਿਲਸ ਜਾ ਰਹੇ ਸਨ।ਮ੍ਰਿਤਕ ਦੇ ਪਰਿਵਾਰਕ ਸੂਤਰਾਂ ਦੇ ਅਨੁਸਾਰ ਜੋਏ ਸੈਣੀ ਦਾ ਜਨਮ ਪੰਜਾਬ ਵਿੱਚ ਹੋਇਆ ਸੀ।

ਉਹ ਆਪਣੇ ਪਿਤਾ ਗੁਰਦੇਵ ਸਿੰਘ ਅਤੇ ਮਾਂ ਕੁਲਜੀਤ ਨਾਲ ਅਮਰੀਕਾ ਆਇਆ ਸੀ। ਡਾ. ਸੈਣੀ ਇੱਕ ਪੇਡੂ ਸਰਜਨ ਸੀ ਅਤੇ ਬੋਸਟਨ ਪੇਲਵਿਕ ਹੈਲਥ ਐਂਡ ਵੈਲਨੈੱਸ, ਇੱਕ ਮਹਿਲਾ ਸਿਹਤ ਸੰਸਥਾ, ਦੀ ਸੰਸਥਾਪਕ ਸੀ। ਉਸਨੇ ਨਿਊਯਾਰਕ ਪ੍ਰੈਸਬੀਟੇਰੀਅਨ ਹਸਪਤਾਲ ਦੇ ਵੇਲ ਕਾਰਨੇਲ ਮੈਡੀਕਲ ਸੈਂਟਰ ਤੋਂ ਪ੍ਰਸੂਤੀ ਅਤੇ ਗਾਇਨੀਕੋਲੋਜੀ ਵਿੱਚ ਆਪਣੀ ਰੈਜ਼ੀਡੈਂਸੀ ਅਤੇ ਨਿਊਯਾਰਕ ਯੂਨੀਵਰਸਿਟੀ ਮੈਡੀਕਲ ਸੈਂਟਰ ਵਿੱਚ ਆਪਣੀ ਫੈਲੋਸ਼ਿਪ ਪੂਰੀ ਕੀਤੀ ਸੀ। ਜੋਏ ਸੰਯੁਕਤ ਰਾਜ ਅਮਰੀਕਾ ਵਿੱਚ ਪਹਿਲੀਆਂ ਔਰਤਾਂ ਵਿੱਚੋਂ ਇੱਕ ਸੀ ਜਿਨ੍ਹਾਂ ਨੇ ਯੂਰੋਗਾਇਨੀਕੋਲੋਜੀ ਅਤੇ ਰੀਕੰਸਟ੍ਰਕਟਿਵ ਪੇਲਵਿਕ ਸਰਜਰੀ ਵਿੱਚ ਫੈਲੋਸ਼ਿਪ ਸਿਖਲਾਈ ਪ੍ਰਾਪਤ ਕੀਤੀ ਅਤੇ ਸੰਨ 2013 ਵਿੱਚ ਇਸ ਵਿਸ਼ੇ ਨੂੰ ਅਧਿਕਾਰਤ ਮੈਡੀਕਲ ਸਬਸਪੈਸ਼ਲਿਟੀ ਦਰਜਾ ਦਿੱਤੇ ਜਾਣ ਤੋਂ ਬਾਅਦ ਉਸ ਦੀ ਕਾਰਗੁਜ਼ਾਰੀ ਪ੍ਰਤੀ ਉਹ ਬੋਰਡ ਤੋਂ ਪ੍ਰਮਾਣਿਤ ਹੋਈ ਸੀ।ਬੋਸਟਨ ਪੇਲਵਿਕ ਹੈਲਥ ਐਂਡ ਵੈਲਨੈਸ ਸੈਂਟਰ ਸ਼ੁਰੂ ਕਰਨ ਤੋਂ ਪਹਿਲਾਂ, ਉਸਨੇ ਯੂਨੀਵਰਸਿਟੀ ਆਫ਼ ਮੈਸੇਚਿਉਸੇਟਸ ਮੈਮੋਰੀਅਲ ਮੈਡੀਕਲ ਸੈਂਟਰ ਵਿੱਚ ਇੱਕ ਅਟੈਂਡਿੰਗ ਫਿਜ਼ੀਸ਼ੀਅਨ ਅਤੇ ਐਸੋਸੀਏਟ ਫੈਲੋਸ਼ਿਪ ਪ੍ਰੋਗਰਾਮ ਡਾਇਰੈਕਟਰ ਵਜੋਂ ਕੰਮ ਕੀਤਾ।

ਇਸ ਤੋਂ ਇਲਾਵਾ, ਉਸਨੇ ਨਿਊਯਾਰਕ ਯੂਨੀਵਰਸਿਟੀ ਮੈਡੀਕਲ ਸੈਂਟਰ ਅਤੇ ਇੰਡੀਆਨਾ ਯੂਨੀਵਰਸਿਟੀ ਮੈਡੀਕਲ ਸੈਂਟਰ ਵਿੱਚ ਵੀ ਇਸੇ ਤਰ੍ਹਾਂ ਦੇ ਅਹੁਦਿਆਂ ‘ਤੇ ਕੰਮ , ਡਾ. ਜੋਏ ਆਪਣੇ ਪਤੀ ਅਤੇ ਤਿੰਨ ਬੱਚਿਆਂ ਨਾਲ ਵੈਸਟਨ ਵਿੱਚ ਰਹਿੰਦੀ ਸੀ। ਉਹ ਕੁਝ ਸਥਾਨਕ ਸਮਾਜਿਕ ਸੰਗਠਨਾਂ ਨਾਲ ਵੀ ਜੁੜੇ ਹੋਈ ਸੀ।ਮ੍ਰਿਤਕ ਡਾ. ਸੈਣੀ ਨੇ ਪਿਟਸਬਰਗ ਯੂਨੀਵਰਸਿਟੀ ਤੋਂ ਪੜ੍ਹਾਈ ਕੀਤੀ ਸੂ।ਜਿੱਥੇ ਉਹ ਆਪਣੇ ਪਤੀ ਮਾਈਕਲ ਗ੍ਰੌਫ ਨੂੰ ਮਿਲੀ। ਮਾਈਕਲ ਨੇ ਵੀ ਉੱਥੇ ਪੜ੍ਹਾਈ ਕੀਤੀ। ਮਾਈਕਲ ਇੱਕ ਪ੍ਰਸਿੱਧ ਨਿਊਰੋਸਰਜਨ ਸੀ। ਮਾਈਕਲ ਵੀ ਇੱਕ ਪਾਇਲਟ ਸੀ। ਉਸਨੇ ਆਪਣੇ ਪਿਤਾ ਤੋਂ ਜਹਾਜ਼ ਉਡਾਉਣ ਦੀ ਸਿਖਲਾਈ ਪ੍ਰਾਪਤ ਕੀਤੀ। ਜੌਏ ਅਤੇ ਮਾਈਕਲ ਆਪਣੇ ਪਿੱਛੇ ਆਪਣੀ ਧੀ ਅਨਿਕਾ, ਮਾਈਕਲ ਦੇ ਮਾਤਾ-ਪਿਤਾ ਸਟੀਫਨ ਅਤੇ ਗੈਬੇਨਾ ਗ੍ਰੋਫ, ਜੌਏ ਦੀ ਮਾਂ ਕੁਲਜੀਤ ਕੋਰ ਅਤੇ ਭੈਣ-ਭਰਾ ਰੇਨੇ ਗ੍ਰੋਫ, ਯਾਰਮ ਗ੍ਰੋਫ ਅਤੇ ਪ੍ਰਸ਼ਾਂਤ ਸੈਣੀ ਸਮੇਤ ਹੋਰ ਪਰਿਵਾਰਕ ਮੈਂਬਰ ਛੱਡ ਗਏ।

ਨਿਊਯਾਰਕ, 16 ਅਪ੍ਰੈਲ (ਰਾਜ ਗੋਗਨਾ )- ਅਮਰੀਕਾ ਵਿੱਚ ਲੱਖਾਂ ਹਿੰਦੂ ਰਹਿੰਦੇ ਹਨ, ਪਰ ਉਨ੍ਹਾਂ ਲਈ ਕੋਈ ਵੱਖਰਾ ਸ਼ਮਸ਼ਾਨਘਾਟ ਨਹੀਂ ਹੈ। ਇਸ ਲਈ, ਉਨ੍ਹਾਂ ਨੂੰ ਆਪਣੇ ਰਿਸ਼ਤੇਦਾਰਾਂ ਦੇ ਅੰਤਿਮ ਸੰਸਕਾਰ ਕਰਨ ਲਈ ਕਿਸੇ ਹੋਰ ਧਰਮ ਦੇ ਸ਼ਮਸ਼ਾਨਘਾਟ ਵਿੱਚ ਕਰਨੇ ਪੈਂਦੇ ਹਨ। ਇਸ ਤੋਂ ਇਲਾਵਾ, ਅਮਰੀਕਾ ਵਿੱਚ, ਅੰਤਿਮ ਸੰਸਕਾਰ ਲਈ ਲੰਮਾ ਇੰਤਜ਼ਾਰ ਕਰਨਾ ਪੈਂਦਾ ਹੈ ਅਤੇ ਇਹ ਮਹਿੰਗੇ ਵੀ ਹੁੰਦੇ ਹਨ। ਇਨ੍ਹਾਂ ਸਮੱਸਿਆਵਾਂ ਦੇ ਮੱਦੇਨਜ਼ਰ, ਹਿੰਦੂ ਭਾਈਚਾਰੇ ਨੇ ਸ਼ਿਕਾਗੋ ਵਿੱਚ ਇੱਕ ਸ਼ਮਸ਼ਾਨਘਾਟ ਬਣਾਉਣ ਦਾ ਫੈਸਲਾ ਕੀਤਾ ਹੈ।ਮਿਲੀ ਜਾਣਕਾਰੀ ਦੇ ਅਨੁਸਾਰ ਕਾਗੋ ਵਿੱਚ 4.6 ਏਕੜ ਵਿੱਚ ਹਿੰਦੂਆਂ ਲਈ ਸ਼ਮਸ਼ਾਨਘਾਟ ਬਣਾਇਆ ਜਾਵੇਗਾ।

ਇਸ ਸ਼ਮਸ਼ਾਨਘਾਟ ਨੂੰ ਬਣਾਉਣ ਦੀ ਲਾਗਤ 5 ਮਿਲੀਅਨ ਡਾਲਰ ਹੋਣ ਦਾ ਅਨੁਮਾਨ ਦੱਸਿਆ ਜਾ ਰਿਹਾ ਹੈ।ਇਸ ਸ਼ਮਸ਼ਾਨਘਾਟ ਦਾ ਸਾਰਾ ਖਰਚਾ ਹਿੰਦੂ ਭਾਈਚਾਰੇ ਵੱਲੋਂ ਚੁੱਕਿਆ ਜਾਵੇਗਾ।ਅਮਰੀਕਾ ਵਿੱਚ ਲੱਖਾਂ ਭਾਰਤੀ ਰਹਿੰਦੇ ਹਨ, ਅਤੇ ਹਿੰਦੂਆਂ ਦੀ ਗਿਣਤੀ ਬਹੁਤ ਜ਼ਿਆਦਾ ਹੈ। ਇੱਕ ਅੰਦਾਜ਼ੇ ਦੇ ਅਨੁਸਾਰ, ਇਸ ਸਮੇਂ ਅਮਰੀਕਾ ਵਿੱਚ 25 ਲੱਖ ਤੋਂ ਵੱਧ ਹਿੰਦੂ ਰਹਿੰਦੇ ਹਨ। ਇੰਨੀ ਵੱਡੀ ਗਿਣਤੀ ਵਿੱਚ ਹਿੰਦੂਆਂ ਦੇ ਬਾਵਜੂਦ, ਇਸ ਸ਼ਮਸ਼ਾਨਘਾਟ ਦੇ ਨਿਰਮਾਣ ਲਈ ਪ੍ਰੋਜੈਕਟ ਲਈ ਇੱਕ ਟਰੱਸਟ ਵੀ ਬਣਾਇਆ ਗਿਆ ਹੈ।

ਨਿਊਯਾਰਕ, 16 ਅਪ੍ਰੈਲ ( ਰਾਜ ਗੋਗਨਾ )-ਕਾਂਗਰਸੀ ਆਗੂ ਅਤੇ ਭੁਲੱਥ ਦੇ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਪੰਜਾਬ ਦੀ ਆਮ ਆਦਮੀ ਪਾਰਟੀ (ਆਪ) ਸਰਕਾਰ ’ਤੇ ਸਖ਼ਤ ਵਾਰ ਕਰਦਿਆਂ, ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਵਿਰੁੱਧ ਸੂਬੇ ਦੀ ਵਿਗੜਦੀ ਕਾਨੂੰਨ ਅਤੇ ਵਿਵਸਥਾ ਦੀ ਸਥਿਤੀ ਨੂੰ ਉਜਾਗਰ ਕਰਨ ਦੇ ਇਲਜ਼ਾਮ ਵਿੱਚ ਦਰਜ ਕੀਤੀ ਗਈ ਪੂਰੀ ਤਰ੍ਹਾਂ ਝੂਠੀ ਅਤੇ ਬੇਬੁਨਿਆਦ ਐਫਆਈਆਰ ਦੀ ਸਖ਼ਤ ਨਿੰਦਾ ਕੀਤੀ ਹੈ। ਖਹਿਰਾ ਵੱਲੋ ਜਾਰੀ ਪ੍ਰੈਸ ਰਿਲੀਜ ਕਰਕੇ ਭੁਲੱਥ ਤੋ ਸ: ਸੁਖਪਾਲ ਸਿੰਘ ਖਹਿਰਾ ਨੇ ਕਿਹਾ, “ਇਹ ਸਿਰਫ਼ ਇੱਕ ਵਿਅਕਤੀ ’ਤੇ ਹਮਲਾ ਨਹੀਂ ਹੈ; ਇਹ ਸਾਡੇ ਬੁਨਿਆਦੀ ਅਧਿਕਾਰ ਬੋਲਣ ਦੀ ਆਜ਼ਾਦੀ ‘ਤੇ ਸਿੱਧਾ ਹਮਲਾ ਹੈ। ਇੱਕ ਲੋਕਤੰਤਰ ਵਿੱਚ, ਵਿਰੋਧੀ ਧਿਰ ਨੂੰ ਸਰਕਾਰ ਦੀ ਜਵਾਬਦੇਹੀ ਯਕੀਨੀ ਬਣਾਉਣ ਦਾ ਪੂਰਾ ਅਧਿਕਾਰ ਹੈ ਬਲਕਿ ਇਹ ਉਸ ਦੀ ਜ਼ਿੰਮੇਵਾਰੀ ਹੈ। ਪਰ ਭਗਵੰਤ ਮਾਨ ਦੇ ਪੰਜਾਬ ਵਿੱਚ, ਜੋ ਵੀ ਸੱਚ ਬੋਲਣ ਦੀ ਹਿੰਮਤ ਕਰਦਾ ਹੈ, ਉਸ ਨੂੰ ਅਪਰਾਧੀ ਘੋਸ਼ਿਤ ਕਰ ਦਿੱਤਾ ਜਾਂਦਾ ਹੈ।ਉਨ੍ਹਾਂ ਨੇ ਕਿਹਾ ਕਿ ਆਪ ਦੀ ਬਦਲਾਖੋਰੀ ਵਾਲੀ ਸਿਆਸਤ ਅਤੇ ਸਰਵਸੱਤਾਵਾਦੀ ਸੋਚ ਨੇ ਪੰਜਾਬ ਨੂੰ ਇੱਕ ਪੁਲਿਸ ਸਟੇਟ ਵਿੱਚ ਬਦਲ ਦਿੱਤਾ ਹੈ, ਜਿੱਥੇ ਲੋਕਤੰਤਰੀ ਆਵਾਜ਼ਾਂ ਨੂੰ ਡਰਾਉਣ-ਧਮਕਾਉਣ ਅਤੇ ਸਰਕਾਰੀ ਮਸ਼ੀਨਰੀ ਦੀ ਦੁਰਵਰਤੋਂ ਨਾਲ ਚੁੱਪ ਕਰਵਾਇਆ ਜਾ ਰਿਹਾ ਹੈ।

“ਇਸ ਤਰ੍ਹਾਂ ਦੀ ਸਪੱਸ਼ਟ ਸਿਆਸੀ ਦੁਸ਼ਮਣੀ ’ਤੇ ਉਤਰ ਕੇ, ਭਗਵੰਤ ਮਾਨ ਨੇ ਸਾਡੇ ਇਲਜ਼ਾਮਾਂ ਦੀ ਪੁਸ਼ਟੀ ਹੀ ਕੀਤੀ ਹੈ। ਸ਼ਾਸਨ ਸਬੰਧੀ ਸਖ਼ਤ ਸਵਾਲਾਂ ਦੇ ਜਵਾਬ ਦੇਣ ਦੀ ਬਜਾਏ, ਉਸ ਦੀ ਸਰਕਾਰ ਆਲੋਚਕਾਂ ’ਤੇ ਪੁਲਿਸ ਨੂੰ ਛੱਡ ਰਹੀ ਹੈ,” ਉਨ੍ਹਾਂ ਅੱਗੇ ਕਿਹਾ।ਸੁਖਪਾਲ ਖਹਿਰਾ ਨੇ ਅੱਗੇ ਇਹ ਵੀ ਚੇਤਾਵਨੀ ਦਿੱਤੀ ਕਿ ਵਿਰੋਧੀ ਧਿਰ ਅਜਿਹੀਆਂ ਦਮਨਕਾਰੀ ਚਾਲਾਂ ਤੋਂ ਡਰੇਗੀ ਨਹੀਂ। “ਜੇ ਅੱਜ ਦੇ ਪੰਜਾਬ ਵਿੱਚ ਸੱਚ ਬੋਲਣਾ ਅਪਰਾਧ ਹੈ, ਤਾਂ ਹਰ ਜ਼ਮੀਰ ਵਾਲੇ ਨਾਗਰਿਕ ਨੂੰ ਐਫਆਈਆਰ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹਿਣਾ ਚਾਹੀਦਾ ਹੈ। ਅਸੀਂ ਪੰਜਾਬ ਦੇ ਲੋਕਾਂ ਲਈ ਆਪਣੀ ਆਵਾਜ਼ ਉਠਾਉਂਦੇ ਰਹਾਂਗੇ, ਚਾਹੇ ਜੋ ਵੀ ਹੋਵੇ,” ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ।ਉਨ੍ਹਾਂ ਨੇ ਸਿਵਲ ਸੁਸਾਇਟੀ, ਮੀਡੀਆ ਅਤੇ ਲੋਕਤੰਤਰੀ ਸੰਸਥਾਵਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪ ਸਰਕਾਰ ਵੱਲੋਂ ਵਿਰੋਧੀ ਧਿਰ ਨੂੰ ਦਬਾਉਣ ਅਤੇ ਸੂਬੇ ਵਿੱਚ ਲੋਕਤੰਤਰ ਦੀਆਂ ਬੁਨਿਆਦਾਂ ਨੂੰ ਕਮਜ਼ੋਰ ਕਰਨ ਦੀਆਂ ਕੋਸ਼ਿਸ਼ਾਂ ਨੂੰ ਗੰਭੀਰਤਾ ਨਾਲ ਨੋਟਿਸ ਵਿੱਚ ਲੈਣ।

(ਹਰਜੀਤ ਲਸਾੜਾ, ਬ੍ਰਿਸਬੇਨ 14 ਅਪਰੈਲ) ‘ਬੋਲਡ ਬਿਊਟੀਜ਼ ਕੂਈਨਜਲੈਂਡ’ ਵੱਲੋਂ ਵਿਸਾਖੀ ਦੇ ਪਾਵਨ ਦਿਹਾੜੇ ‘ਤੇ ਡਾ. ਅੰਬੇਡਕਰ ਦੇ ਜਨਮ ਦਿਨ ਨੂੰ ਸਮਰਪਿਤ ਇੱਕ ਯਾਦਗਾਰੀ ਸਮਾਗਮ ਕਰਵਾਇਆ ਗਿਆ। ਇਪਸਵਿਚ ਸ਼ਹਿਰ ਦੇ ਸਪ੍ਰਿੰਗਫੀਲਡ ਦੇ ਰੋਬੈਲ ਡੋਮੇਨ ਵਿਖੇ ਆਯੋਜਿਤ ਇਹ ਸਮਾਗਮ ਪੰਜਾਬੀ ਸਭਿਆਚਾਰ, ਏਕਤਾ ਅਤੇ ਸਮਾਜਿਕ ਸੂਝਬੂਝ ਨੂੰ ਸਮਰਪਿਤ ਰਿਹਾ। ਇਹ ਪ੍ਰਗਟਾਵਾ ਸਮਾਰੋਹ ਸੰਸਥਾਪਕ ਰੀਤੂ ਅਹੀਰ ਅਤੇ ਮੋਨਾ ਸਿੰਘ ਨੇ ਕੀਤਾ। ਇਸ ਮੌਕੇ ਅੰਬੇਡਕਰ ਦੇ ਜਨਮ ਦਿਨ ਨੂੰ ਸਮਰਪਿਤ ਕੇਕ ਕੱਟਿਆ ਗਿਆ।

ਉਹਨਾਂ ਦੇ ਜਨਮ ਦਿਹਾੜੇ ਨੂੰ ਨਿਆਂ, ਬਰਾਬਰੀ ਅਤੇ ਸਵੈ-ਗੌਰਵ ਦੇ ਸੱਦੇ ਵਜੋਂ ਯਾਦ ਕੀਤਾ ਗਿਆ। ਬੁਲਾਰਿਆਂ ‘ਚ ਰੀਤੂ ਅਹਿਰ, ਹਰਿਆਣਵੀ ਐਸੋਸੀਏਸ਼ਨ ਤੋਂ ਨੀਤੂ ਸੁਹਾਗ, ਕੁਲਦੀਪ ਕੌਰ, ਜਗਰੂਪ ਬੁੱਟਰ ਆਦਿ ਨੇ ਡਾ. ਅੰਬੇਡਕਰ ਦੀ ਸਿੱਖਿਆ ਅਤੇ ਸੰਵਿਧਾਨ ਨਿਰਮਾਣ ਵਿੱਚ ਉਨ੍ਹਾਂ ਦੀ ਭੂਮਿਕਾ ਬਾਰੇ ਵਿਚਾਰ ਸਾਂਝੇ ਕੀਤੇ।

ਉਹਨਾਂ ਵੱਲੋਂ ਮਹਿਲਾਵਾਂ ਲਈ ਕੀਤੇ ਕੰਮਾਂ ਨੂੰ ਸਲਾਹਿਆ ਗਿਆ। ਇਸ ਸਮਾਗਮ ਦੌਰਾਨ ਸੱਭਿਆਚਾਰਕ ਵੰਨਗੀਆਂ ਖਿੱਚ ਦਾ ਕੇਂਦਰ ਰਹੀਆਂ। ਵੀਰਾਂਸ਼ੂ ਸਿੰਘ ਅਤੇ ਡਾਇਸ਼ਾ ਸਿੰਘ ਦੇ ਭੰਗੜੇ ਨੇ ਪੰਜਾਬੀ ਰੰਗ ਬੰਨਿਆ। ਇਹ ਸਮਾਗਮ ਭਾਰਤੀ, ਪੰਜਾਬੀ ਸੰਸਕ੍ਰਿਤੀ ਅਤੇ ਇਤਿਹਾਸ ਨੂੰ ਮਨਾਉਣ ਲਈ ਇੱਕ ਮਹੱਤਵਪੂਰਨ ਮੌਕਾ ਸੀ। ਸੰਸਥਾ ਵੱਲੋਂ ਸਮੂਹ ਭਾਈਚਾਰੇ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ ਗਿਆ।

Motivation is the invisible thread that weaves confidence, creativity, and ambition into a child’s character. This quiet force transforms curiosity into achievement and effort into excellence. Recognising this, Canada’s educational curriculum places significant emphasis on fostering a nurturing environment where encouragement replaces criticism and every child’s potential is celebrated. Teachers and school authorities have adopted an approach that avoids negative remarks about a child’s activities or personality, instead cultivating a space where young minds flourish through appreciation and positive reinforcement.

A heartwarming example of this philosophy in action recently unfolded in many schools in Chestermere, near Calgary, where a greeting card printing company initiated an inspiring project. Company representatives provided blank drawing sheets to students, inviting them to illustrate their New Year’s cards without any imposition or correction. Among the eager participants were two young artists: a first-grade student and a third-grade student(whose cards are published with this write-up), both pouring their imagination onto the pages. Their drawings, along with those of other children were printed exactly as they had created them. When the children received twenty copies of their self-designed cards, their joy was boundless. They held for the first time, a tangible manifestation of their creativity—validated, appreciated, and ready to be shared with family and friends.

The impact of this seemingly simple initiative was profound. The excitement in their eyes and the pride in their voices as they showed their cards to their loved ones demonstrated how deeply motivation influences a child’s growth. It was not merely about the act of drawing; it was about the realization that their ideas, expressions, and creativity mattered. Such experiences instil a belief in children’s abilities, fostering confidence that becomes the foundation of lifelong learning and success.

Beyond the classroom walls, this kind of encouragement shapes children’s approach to life itself. Children who grow up in environments where their efforts are acknowledged learn to embrace challenges rather than fear them. They develop resilience in the face of setbacks and a passion for exploring new horizons. When they are told that their work is valuable, they begin to see themselves as capable individuals with something meaningful to contribute to the world.

In such nurturing spaces, the thinkers, dreamers, and leaders of tomorrow are born. A child’s brilliance is not measured solely by grades or standardized tests but by their ability to imagine, create, and believe in themselves. If every child were encouraged to explore their potential without fear of criticism, who knows what remarkable heights they could reach? The possibilities are limitless when motivation fuels the journey.

Ravinder Singh Sodhi
ravindersodhi51@gmail.com
Calgary, Canada
001-604-369-2371

ਬਲਵਿੰਦਰ ਸਿੰਘ ਭੁੱਲਰ
ਪੰਜਾਬ ਸਮੁੱਚੇ ਦੇਸ਼ ਦੇ ਵਿਕਾਸ ਦਾ ਧੁਰਾ ਹੈ। ਸਦੀਆਂ ਤੋਂ ਦੇਸ਼ ਵਿੱਚ ਅਨਾਜ ਦੇ ਕਾਲ ਵਰਗੀਆਂ ਸਥਿਤੀਆਂ ਨਾਲ ਜੂਝਦਾ ਰਿਹਾ ਹੈ ਅਤੇ ਵਤਨ ਨੂੰ ਬਚਾਉਣ ਅਤੇ ਦੇਸ਼ ਤੇ ਹੋ ਰਹੇ ਵਿਦੇਸ਼ੀ ਹਮਲਾਵਰਾਂ ਨਾਲ ਟਾਕਰਾ ਕਰਦਾ ਰਿਹਾ ਹੈ। ਦੇਸ਼ ਦੀ ਤਰੱਕੀ ਤੇ ਵਿਕਾਸ ਲਈ ਕੀਤੇ ਪੰਜਾਬ ਵਾਸੀਆਂ ਦੇ ਯਤਨ ਕੋਈ ਲੁਕੇ ਛੁਪੇ ਨਹੀਂ ਹਨ। ਦੇਸ਼ ਦੀ ਆਜਾਦੀ ਲਈ ਕੀਤੀਆਂ ਕੁਰਬਾਨੀਆਂ ਬਾਰੇ ਸਾਰੀ ਦੁਨੀਆਂ ਭਲੀਭਾਂਤ ਜਾਣਦੀ ਹੈ। ਅੱਜ ਦੀ ਪੰਜਾਬੀ ਦੇਸ਼ ਦੀਆਂ ਸਰਹੱਦਾਂ ਤੇ ਸ਼ਹੀਦੀਆਂ ਪ੍ਰਾਪਤ ਕਰ ਰਹੇ ਹਨ ਅਤੇ ਦੇਸ਼ ਦੇ ਅਨਾਜ ਭੰਡਾਰ ਵਿੱਚ ਵੱਡਾ ਯੋਗਦਾਨ ਪਾ ਰਹੇ ਹਨ। ਪਰ ਇਸਦੇ ਬਾਵਜੂਦ ਵੀ ਪੰਜਾਬ ਵਿੱਚ ਅਮਨ ਸਾਂਤੀ ਭੰਗ ਕਰਨ ਲਈ ਸਾਜਿਸ਼ਾਂ ਹੁੰਦੀਆਂ ਰਹਿੰਦੀਆਂ ਹਨ ਅਤੇ ਸਰਕਾਰਾਂ ਮੂਕ ਦਰਸ਼ਕ ਬਣ ਕੇ ਵੇਖਦੀਆਂ ਰਹਿੰਦੀਆਂ ਹਨ।

ਪੰਜਾਬ ਨੇ ਪਹਿਲਾਂ ਲੰਬਾ ਸਮਾਂ ਕਾਲਾ ਦੌਰ ਹੰਢਾਇਆ ਹੈ। ਜਿਸ ਸਦਕਾ ਪੰਜਾਬ ਦਾ ਏਨਾ ਵੱਡਾ ਨੁਕਸਾਨ ਹੋਇਆ ਹੈ, ਜਿਸਦਾ ਘਾਟਾ ਅੱਜ ਤੱਕ ਪੂਰਾ ਨਹੀਂ ਕੀਤਾ ਜਾ ਸਕਿਆ। ਪੰਜਾਬ ਸਿਰ ਚੜਿਆ ਕਰਜ਼ਾ ਨਹੀਂ ਉਤਾਰਿਆ ਜਾ ਸਕਿਆ। ਹਜ਼ਾਰਾਂ ਸਿੱਖ ਨੌਜਵਾਨ ਝੂਠੇ ਪੁਲਿਸ ਮੁਕਾਬਲਿਆਂ ਵਿੱਚ ਮਾਰੇ ਗਏ। ਵੱਡੀ ਗਿਣਤੀ ਵਿੱਚ ਪੁਲਿਸ ਵਾਲਿਆਂ ਤੇ ਲੀਡਰਾਂ ਦੇ ਕਤਲ ਹੁੰਦੇ ਰਹੇ। ਹਿੰਦੂਆਂ ਨੂੰ ਬੱਸਾਂ ਚੋਂ ਲਾਹ ਕੇ ਮਾਰਿਆ ਜਾਂਦਾ ਰਿਹਾ। ਇੱਥੋ ਵਿਗੜੀ ਸਥਿਤੀ ਕਾਰਨ ਹੀ ਸ੍ਰੀ ਦਰਬਾਰ ਸਾਹਿਬ ਤੇ ਹਮਲਾ ਹੋਇਆ ਅਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਢਹਿ ਢੇਰੀ ਕੀਤਾ ਗਿਆ। ਦੇਸ਼ ਦੀ ਪ੍ਰਧਾਨ ਮੰਤਰੀ ਅਤੇ ਪੰਜਾਬ ਦੇ ਮੁੱਖ ਮੰਤਰੀ ਦਾ ਕਤਲ ਹੋਇਆ। ਪੰਜਾਬ ਸਿਰ ਅਰਬਾਂ ਰੁਪਏ ਦਾ ਕਰਜ਼ਾ ਚੜ ਗਿਆ। ਸੈਂਕੜੇ ਨੌਜਵਾਨ ਉਸ ਸਮੇਂ ਤੋਂ ਜੇਲਾਂ ਵਿੱਚ ਰੁਲ ਰਹੇ ਹਨ, ਜਿਹਨਾਂ ਦਾ ਜੀਵਨ ਤਬਾਹ ਹੋ ਗਿਆ।

ਸਾਲ 1978 ਵਿੱਚ ਹੀ ਜਦੋਂ ਕਾਲੇ ਦੌਰ ਵੱਲ ਕਦਮ ਵਧ ਰਹੇ ਸਨ, ਜੇ ਸਮੇਂ ਦੀਆਂ ਸਰਕਾਰਾਂ ਗੌਰ ਕਰ ਲੈਂਦੀਆਂ ਅਤੇ ਰੋਕਣ ਲਈ ਠੋਸ ਨੀਤੀ ਤੈਅ ਕਰ ਲੈਂਦੀਆਂ ਤਾਂ ਏਡਾ ਵੱਡਾ ਨੁਕਸਾਨ ਨਹੀਂ ਸੀ ਹੋਣਾ। ਇਹ ਵੀ ਸੱਚਾਈ ਹੈ ਕਿ ਪੰਜਾਬ ਦੇ ਲੰਬਾ ਸਮਾਂ ਚੱਲੇ ਦੌਰ ਵਿੱਚ ਪੰਜਾਬ ਦੇ ਹਿੰਦੂ ਸਿੱਖਾਂ ਵਿੱਚ ਕੋਈ ਝਗੜਾ ਨਹੀਂ ਸੀ ਹੋਇਆ, ਪਿੰਡਾਂ ਵਿੱਚ ਗਿਣਤੀ ਦੇ ਘਰ ਹੋਣ ਦੇ ਬਾਵਜੂਦ ਵੀ ਹਿੰਦੂ ਧਰਮ ਨਾਲ ਸਬੰਧਤ ਲੋਕ ਸੁਖ ਸਾਂਤੀ ਨਾਲ ਵਸਦੇ ਰਹੇ। ਪਰ ਹਿੰਦੂ ਸਿੱਖਾਂ ਵਿੱਚ ਪਾੜਾ ਪਾਉਣ ਲਈ ਸਾਜਿਸ਼ਾਂ ਜਰੂਰ ਰਚੀਆਂ ਜਾਂਦੀਆਂ ਰਹੀਆਂ। ਸਮੇਂ ਦੀਆਂ ਸਰਕਾਰਾਂ ਨੇ ਇਸ ਪਾੜਾ ਪਾਊ ਨੀਤੀ ਨੂੰ ਰੋਕਣ ਦਾ ਯਤਨ ਕਰਨ ਦੀ ਬਜਾਏ ਹਵਾ ਦਿੱਤੀ, ਜਿਸ ਸਦਕਾ ਕੇਵਲ ਪੰਜਾਬ ਹੀ ਨਹੀਂ ਸਮੁੱਚੇ ਦੇਸ਼ ਦਾ ਵੀ ਨੁਕਸਾਨ ਹੋਇਆ।

ਪੰਜਾਬ ਅਤੇ ਦੇਸ਼ ਦੇ ਕਾਲੇ ਦੌਰ ਸਮੇਂ ਹੋਏ ਨੂਕਸਾਨ ਨੂੰ ਸਿਆਸਤਦਾਨਾਂ ਨੇ ਵੀ ਰੱਜ ਕੇ ਵਰਤਿਆ। ਕੋਈ ਕਾਂਗਰਸ ਨੂੰ ਦੋਸ਼ੀ ਕਹਿੰਦਾ, ਕੋਈ ਭਾਜਪਾ ਨੂੰ ਅਤੇ ਕੋਈ ਅਕਾਲੀ ਦਲ ਨੂੰ, ਪਰ ਇਸ ਹਮਾਮ ਵਿੱਚ ਸਾਰੇ ਨੰਗੇ ਸਨ। ਹੁਣ ਤਾਂ ਇਸ ਸਬੰਧੀ ਦਰਜਨਾਂ ਪੁਸਤਕਾਂ ਛਪ ਚੁੱਕੀਆਂ ਹਨ, ਜਿਹਨਾਂ ਵਿੱਚ ਅੱਤਵਾਦ ਵਿਰੁੱਧ ਲੜਾਈ ਲੜਣ ਵਾਲਿਆਂ ਅਤੇ ਅੱਤਵਾਦ ਦੇ ਹੱਕ ਵਿੱਚ ਭੁਗਤਣ ਵਾਲਿਆਂ ਦੀਆਂ ਵੀ ਹਨ। ਪਰ ਸਭ ਨੇ ਇਹੋ ਹੀ ਸਪਸ਼ਟ ਕੀਤਾ ਹੈ ਕਿ ਉਸ ਦੌਰ ਨਾਲ ਪੰਜਾਬ ਦੀ ਨੌਜਵਾਨੀ ਦਾ ਘਾਣ ਹੋਇਆ ਹੈ, ਸੂਬੇ ਦੀ ਆਰਥਿਕ, ਧਾਰਮਿਕ ਤੇ ਸਮਾਜਿਕ ਸਥਿਤੀ ਨੂੰ ਵੱਡੀ ਸੱਟ ਵੱਜੀ। ਪਰ ਜੇ ਲਾਭ ਦੀ ਗੱਲ ਕਰੀਏ ਤਾਂ ਨਾ ਸੂਬੇ ਦਾ ਹੋਇਆ ਅਤੇ ਨਾ ਦੇਸ਼ ਦਾ, ਜੇ ਲਾਭ ਹੋਇਆ ਤਾਂ ਕੁੱਝ ਰਾਜਨੀਤਕ ਪਾਰਟੀਆਂ ਦਾ ਹੋਇਆ ਜਿਹਨਾਂ ਦਰਬਾਰ ਸਾਹਿਬ ਉੱਪਰ ਹੋਏ ਹਮਲੇ, ਜਾਂ ਹਿੰਦੂਆਂ ਦੇ ਕੀਤੇ ਕਤਲਾਂ ਆਦਿ ਨੂੰ ਵਰਤ ਕੇ ਸੱਤਾ ਹਾਸਲ ਕੀਤੀ। ਪਰ ਅੱਜ ਤੱਕ ਵੀ ਬਹੁਤੇ ਲੋਕ ਇਹਨਾਂ ਸਾਜਿਸ਼ਾਂ ਨੂੰ ਸਮਝ ਨਹੀਂ ਸਕੇ।

ਅੱਜ ਵੀ ਪੰਜਾਬ ਵਿੱਚ ਸਾਰੇ ਧਰਮਾਂ ਦੇ ਲੋਕ ਏਕਤਾ ਨਾਲ ਵਸਦੇ ਹਨ, ਭਾਈਚਾਰਕ ਸਾਂਝ ਕਾਇਮ ਹੈ। ਪਰ ਲਗਦਾ ਹੈ ਕਿ ਇਹ ਸੁਖੀ ਵਸਦੇ ਲੋਕ ਕੁੱਝ ਸਰਾਰਤੀਆਂ ਨੂੰ ਚੰਗੇ ਨਹੀਂ ਲਗਦੇ। ਪੰਜਾਬ ਵਿੱਚ ਮੌਜੂਦਾ ਭਗਵੰਤ ਮਾਨ ਦੀ ਸਰਕਾਰ ਦੌਰਾਨ ਪੰਜਾਬ ਵਿੱਚ ਕਰੀਬ ਦਸ ਗ੍ਰਨੇਡ ਹਮਲੇ ਹੋ ਚੁੱਕੇ ਹਨ, ਜੋ ਪੁਲਿਸ ਚੌਂਕੀਆਂ ਅਤੇ ਥਾਨਿਆਂ ਦੇ ਨਜਦੀਕ ਕੀਤੇ ਗਏ। ਬੀਤੇ ਦਿਨੀਂ ਭਾਜਪਾ ਦੇ ਇੱਕ ਸੀਨੀਅਰ ਆਗੂ, ਜੋ ਪੰਜਾਬ ਦਾ ਸਾਬਕਾ ਮੰਤਰੀ ਵੀ ਹੈ ਉਸਦੇ ਜਲੰਧਰ ਸਥਿਤ ਘਰ ਤੇ ਵੀ ਗ੍ਰਨੇਡ ਹਮਲਾ ਕੀਤਾ ਗਿਆ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਹਮਲਾ ਵੀ ਈ ਰਿਕਸ਼ਾ ਤੇ ਆਏ ਨੌਜਵਾਨਾਂ ਨੇ ਕੀਤਾ ਅਤੇ ਫਰਾਰ ਹੋ ਗਏ। ਦੂਜੇ ਦਿਨ ਦੋ ਹਮਲਾਵਰ ਫੜ ਵੀ ਲਏ ਗਏ ਤੇ ਪੁਲਿਸ ਨੇ ਬਿਆਨ ਦਿੱਤਾ ਕਿ ਇਹਨਾਂ ਦਾ ਪਾਕਿਸਤਾਨ ਦੀ ਏਜੰਸ਼ੀ ਆਈ ਐੱਸ ਆਈ ਨਾਲ ਸਬੰਧ ਹੈ। ਸੁਆਲ ਉੱਠਦਾ ਹੈ ਕਿ ਪਾਕਿਸਤਾਨ ਦੀ ਇੱਕ ਵੱਡੀ ਖ਼ੁਫੀਆ ਏਜੰਸੀ ਹੁਣ ਈ ਰਿਕਸ਼ਾ ਵਾਲਿਆਂ ਤੱਕ ਪਹੁੰਚ ਗਈ ਹੈ। ਦੂਜੀ ਗੱਲ ਇੱਕ ਰਾਤ ਦੇ ਬਾਰਾਂ ਇੱਕ ਵਜੇ ਹਮਲਾ ਹੋਇਆ ਦੂਜੇ ਦਿਨ ਫਰਾਰ ਹੋਏ ਦੋਸ਼ੀ ਕਾਬੂ ’ਚ ਵੀ ਆ ਗਏ, ਕੀ ਪੁਲਿਸ ਉਹਨਾਂ ਦੇ ਕੋਲ ਹੀ ਬੈਠੀ ਸੀ।

ਅਸਲ ਵਿੱਚ ਪੰਜਾਬ ਸਰਕਾਰ ਤੇ ਪੁਲਿਸ ਅਜਿਹੇ ਬਿਆਨਾਂ ਨਾਲ ਆਪਣਾ ਬਚਾਅ ਕਰਨ ਲਈ ਅਤੇ ਲੋਕਾਂ ਵਿੱਚ ਆਪਣੀ ਸ਼ਾਖ ਬਚਾਉਣ ਲਈ ਯਤਨਸ਼ੀਲ ਹਨ। ਇਹ ਗੱਲ ਪੰਜਾਬ ਸਰਕਾਰ ਤੇ ਪੁਲਿਸ ਨੂੰ ਸਮਝ ਲੈਣੀ ਚਾਹੀਦੀ ਹੈ ਕਿ ਜੇਕਰ ਤਨਦੇਹੀ, ਸੁਹਿਰਦਤਾ ਅਤੇ ਡੁੰਘਾਈ ਨਾਲ ਅਜਿਹੀਆਂ ਘਟਨਾਵਾਂ ਬਾਰੇ ਜਾਂਚ ਪੜਤਾਲ ਕਰਕੇ ਠੋਸ ਕਦਮ ਨਾ ਚੁੱਕੇ ਤਾਂ ਹਾਲਾਤ ਕਾਬੂ ਤੋਂ ਬਾਹਰ ਹੋ ਸਕਦੇ ਹਨ। ਪੰਜਾਬ ਦੇ ਲੋਕ ਸੁਖ ਸਾਂਤੀ ਚਾਹੁੰਦੇ ਹਨ। ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਉਹ ਪੰਜਾਬ ਵਿਰੁੱਧ ਰਚੀਆਂ ਜਾ ਰਹੀਆਂ ਸਾਜਿਸ਼ਾਂ ਨੂੰ ਲੋਕਾਂ ਸਾਹਮਣਾ ਨੰਗਾ ਕਰੇ ਅਤੇ ਇਹਨਾਂ ਸਾਜਿਸ਼ਾਂ ਨੂੰ ਨਾਕਾਮ ਕਰਨ ਲਈ ਠੋਸ ਨੀਤੀ ਤੈਅ ਕੀਤੀ ਜਾਵੇ।

ਮੁੱਖ ਮੰਤਰੀ ਭਗਵੰਤ ਮਾਨ ਤੇ ਉਸਦੇ ਸਾਥੀ ਪ੍ਰਾਪੇਗੰਡਾ ਰਾਜਨੀਤੀ ਦਾ ਤਿਆਗ ਕਰਕੇ ਪੰਜਾਬ ਦੇ ਹਿਤ ਲਈ ਕੰਮ ਕਰਨ। ਦੁੱਖ ਦੀ ਗੱਲ ਹੈ ਕਿ ਅੱਜ ਜਦੋਂ ਪੰਜਾਬ ਵਿੱਚ ਗ੍ਰਨੇਡ ਹਮਲੇ ਹੋ ਰਹੇ ਹਨ, ਮੁੱਖ ਮੰਤਰੀ ਅਤੇ ਮੰਤਰੀ ਪੰਜਾਬ ਦੇ ਸਕੂਲਾਂ ਵਿੱਚ ਕਮਰਿਆਂ ਜਾਂ ਕੰਧਾਂ ਦੀ ਮੁਰੰਮਤ ਦੇ ਉਦਘਾਟਨ ਕਰ ਰਹੇ ਹਨ। ਇੱਥੇ ਹੀ ਬੱਸ ਨਹੀਂ ਸਕੂਲਾਂ ਵਿੱਚ ਇਹਨਾਂ ਉਦਘਾਟਨਾਂ ਲਈ ਆਪਣੀ ਪਾਰਟੀ ਦੇ ਹਾਈਕਮਾਂਡ ਦੇ ਉਹਨਾਂ ਆਗੂਆਂ, ਜਿਹਨਾਂ ਲੋਕਾਂ ਨੂੰ ਦਿੱਲੀ ਵਾਲਿਆਂ ਨੇ ਨਕਾਰ ਦਿੱਤਾ ਹੈ ਅਤੇ ਜਿਹਨਾਂ ਵਿਰੁੱਧ ਭਿ੍ਰਸਟਾਚਾਰ ਵਰਗੇ ਮੁਕੱਦਮੇ ਦਰਜ ਹਨ, ਉਹਨਾਂ ਨੂੰ ਲੋਕਾਂ ਦੇ ਰੂਬਰੂ ਕਰਵਾ ਰਹੇ ਹਨ ਤੇ ਭੰਗੜੇ ਵਿਖਾ ਰਹੇ ਹਨ। ਲੋਕਾਂ ਦਾ ਧਿਆਨ ਅਸਲ ਮੁੱਦਿਆਂ ਜਾਂ ਰਾਜ ਸਰਕਾਰ ਦੀਆਂ ਫੇਲ ਨੀਤੀਆਂ ਤੋਂ ਲਾਂਭੇ ਕਰਨ ਲਈ ਬਲਡੋਜਰ ਚਲਾਇਆ ਜਾ ਰਿਹਾ ਹੈ। ਪੁਲਿਸ ਵੱਲੋਂ ਇਨਕਾਊਂਟਰਾਂ ਵਿੱਚ ਪੈਰਾਂ ਲੱਤਾਂ ਵਿੱਚ ਗੋਲੀਆਂ ਮਾਰੀਆਂ ਜਾ ਰਹੀਆਂ ਹਨ। ਨਸ਼ਿਆਂ ਵਿਰੁੱਧ ਵੱਡੀ ਪੱਧਰ ਤੇ ਪ੍ਰਚਾਰ ਕੀਤਾ ਜਾ ਰਿਹਾ ਹੈ। ਜੇ ਨਸ਼ਿਆਂ ਜਾਂ ਰੋਜਗਾਰ ਲਈ ਕੁੱਝ ਕੰਮ ਕੀਤਾ ਵੀ ਜਾ ਰਿਹਾ ਹੈ ਤਾਂ ਇਹ ਕਿਸੇ ਤੇ ਅਹਿਸਾਨ ਨਹੀਂ ਹੈ, ਸਰਕਾਰਾਂ ਦਾ ਇਹ ਫ਼ਰਜ ਤੇ ਕਰਤੱਵ ਹੈ। ਹੋਣਾ ਚਾਹੀਦਾ ਹੈ ਅਤੇ ਜੇ ਹੋ ਰਿਹਾ ਹੈ ਤਾਂ ਚੰਗੀ ਗੱਲ ਹੈ। ਪਰ ਹਾਲਾਤਾਂ ਨੂੰ ਧਿਆਨ ਵਿੱਚ ਜਰੂਰ ਰੱਖਣਾ ਚਾਹੀਦਾ ਹੈ।

ਇੱਕ ਕਹਾਵਤ ਹੈ ਕਿ ‘‘ਪਿੰਡ ਉਜੜਿਆ ਜਾਵੇ ਕਮਲੀ ਨੂੰ ਗਿੱਟੇ ਕੂਚਣ ਦੀ’’ ਪੰਜਾਬ ਸਰਕਾਰ ਨੂੰ ਰੰਗਾ ਰੰਗ ਪ੍ਰੋਗਰਾਮਾਂ ਤੋਂ ਸੰਕੋਚ ਕਰਕੇ ਪੰਜਾਬ ਦੇ ਹਾਲਾਤ ਵਿਗਾੜਣ ਵਾਲੀਆਂ ਸਾਜਿਸ਼ਾਂ ਵਿਰੁੱਧ ਠੋਸ ਕਾਰਵਾਈਆਂ ਕਰਨ ਵੱਲ ਧਿਆਨ ਕੇਂਦਰਤ ਕਰਨਾ ਚਾਹੀਦਾ ਹੈ। ਪੰਜਾਬ ਦੀਆਂ ਰਾਜਨੀਤਕ ਪਾਰਟੀਆਂ ਨੂੰ ਵੀ ਇੱਕ ਦੂਜੇ ਵਿਰੁੱਧ ਭੜਾਸ ਕੱਢਣ ਦੀ ਬਜਾਏ ਪੰਜਾਬ ਵਿੱਚ ਸਾਂਤੀ ਲਈ ਇੱਕਮੁੱਠਤਾ ਨਾਲ ਕੰਮ ਕਰਨਾ ਚਾਹੀਦਾ ਹੈ। ਪੰਜਾਬ ਵਾਸੀਆਂ ਨੂੰ ਸੁਚੇਤ ਰਹਿਣਾ ਚਾਹੀਦਾ ਹੈ ਕਿ ਸੂਬੇ ਦੇ ਹਾਲਾਤਾਂ ਨੂੰ ਵਿਗੜਣ ਤੋਂ ਬਚਾਇਆ ਜਾ ਸਕੇ।

ਮੋਬਾ: 098882 75913