(ਹਰਜੀਤ ਲਸਾੜਾ, ਬ੍ਰਿਸਬੇਨ 4 ਦਸੰਬਰ) 2025-26 ਐਸ਼ੇਜ਼ ਸੀਰੀਜ਼ ਦਾ ਦੂਜਾ ਟੈਸਟ ਮੈਚ 4 ਤੋਂ 8 ਦਸੰਬਰ ਤੱਕ ਬ੍ਰਿਸਬੇਨ ਦੇ ਗਾਬਾ ਵਿਖੇ ਖੇਡਿਆ ਜਾਵੇਗਾ, ਜੋ ਪਹਿਲੀ ਵਾਰ ਡੇ-ਨਾਈਟ ਫਾਰਮੈਟ ਵਿੱਚ ਹੋਵੇਗਾ ਅਤੇ ਪਿੰਕ ਬਾਲ ਨਾਲ ਖੇਡਿਆ ਜਾਵੇਗਾ। ਗਾਬਾ ਵਿੱਚ ਇੰਗਲੈਂਡ ਟੀਮ ਆਪਣੀ ਬਹਾਲੀ ਲਈ ਬੇਕਰਾਰ ਹੈ, ਪਰ ਗਾਬਾ ਆਸਟ੍ਰੇਲੀਆ ਲਈ ਹਮੇਸ਼ਾ ਮਜ਼ਬੂਤ ਕਿਲ੍ਹਾ ਰਿਹਾ ਹੈ ਜਿੱਥੇ ਉਹਨਾਂ ਨੇ ਐਸ਼ੇਜ਼ ਵਿੱਚ 33 ਟੈਸਟਾਂ ਵਿੱਚੋਂ 19 ਜਿੱਤੇ ਤੇ ਸਿਰਫ 9 ਹਾਰੇ ਹਨ। ਇੰਗਲੈਂਡ ਨੂੰ ਇੱਥੇ ਸਿਰਫ਼ 4 ਵਾਰ ਜਿੱਤ ਮਿਲੀ ਹੈ। ਮੈਚ 4 ਦਸੰਬਰ ਨੂੰ ਦੁਪਹਿਰ 2 ਵਜੇ ਲੋਕਲ ਟਾਈਮ (ਬ੍ਰਿਸਬੇਨ) ‘ਤੇ ਸ਼ੁਰੂ ਹੋਵੇਗਾ ਅਤੇ ਡੇ-ਨਾਈਟ ਫਾਰਮੈਟ ਕਾਰਨ ਖੇਡ ਨੂੰ ਰੌਸ਼ਨੀ ਵਿੱਚ ਖੇਡਿਆ ਜਾਵੇਗਾ।
ਕਪਤਾਨ ਸਟੀਵ ਸਮਿਥ ਦੀ ਅਗਵਾਈ ਵਾਲੀ ਆਸਟ੍ਰੇਲੀਆ ਟੀਮ ਵਿੱਚ ਟ੍ਰੈਵਿਸ ਹੈੱਡ, ਸਕਾਟ ਬੋਲੈਂਡ, ਐਲੇਕਸ ਕੈਰੀ (ਵਿਕਟਕੀਪਰ-ਬੱਲੇਬਾਜ਼), ਬ੍ਰੈਂਡਨ ਡੌਗੇਟ ਅਤੇ ਕੈਮਰਨ ਗ੍ਰੀਨ (ਆਲਰਾਊਂਡਰ) ਵਰਗੇ ਬੱਲੇਬਾਜ਼ਾਂ ਨਾਲ ਉਹ ਬੌਂਸੀ ਪਿੱਚ ਦਾ ਫਾਇਦਾ ਲਵੇਗੀ। ਪੈਟ ਕਮਿੰਸ, ਜੋਸ਼ ਹੇਜ਼ਲਵੁੱਡ ਅਤੇ ਉਸਮਾਨ ਖਵਾਜਾ ਸੱਟ ਦੇ ਚੱਲਦਿਆਂ ਨਹੀਂ ਖੇਡਣਗੇ ਅਤੇ ਸਪਿੰਨਰ ਨੇਥਨ ਲਿਓਨ ਦੀ ਫਿੱਟਨੈੱਸ ’ਤੇ ਵੀ ਨਜ਼ਰ ਰਹੇਗੀ। ਉੱਧਰ ਬੈਨ ਸਟੋਕਸ ਦੀ ਕਪਤਾਨੀ ਵਾਲੀ ਇੰਗਲੈਂਡ ਟੀਮ ਨੇ ਪਹਿਲੇ ਟੈਸਟ ਦੀ ਹਾਰ ਤੋਂ ਬਾਅਦ ਸਪਿਨ ਤੇ ਬੱਲੇਬਾਜ਼ ਵਿਲ ਜੈਕਸ ਨੂੰ ਵਾਪਸ ਲਿਆਂਦਾ ਹੈ, ਜੋ ਤਿੰਨ ਸਾਲਾਂ ਬਾਅਦ ਟੈਸਟ ਵਾਪਸੀ ਕਰ ਰਿਹਾ ਹੈ। ਜੋ ਰੂਟ ਅਤੇ ਹੈਰੀ ਬ੍ਰੋਕ ਨਾਲ ਬੈਟਿੰਗ ਮਜ਼ਬੂਤ ਹੈ। ਐਟਕਿੰਸਨ, ਕਾਰਸੇ ਅਤੇ ਆਰਚਰ ਮੋਹਰੀ ਤੇਜ਼ ਗੇਂਦਬਾਜ਼ ਹੋਣਗੇ।
ਇੰਗਲੈਂਡ ਦੇ ਆਲਰਾਊਂਡਰ ਵਿਲ ਜੈਕਸ ਨੇ ਕਿਹਾ, “ਗਾਬਾ ਖ਼ਤਰਨਾਕ ਜਗ੍ਹਾ ਹੈ, ਪਰ ਅਸੀਂ ਵਾਪਸੀ ਕਰਾਂਗੇ।” ਆਸਟ੍ਰੇਲੀਆ ਦੇ ਕੋਚ ਐਂਡਰਿਊ ਮੈਕਡੋਨਲਡ ਨੇ ਕਿਹਾ ਕਿ “ਇਹ ਸੀਰੀਜ਼ ਅਜੇ ਬਹੁਤ ਲੰਮੀ ਹੈ ਅਤੇ ਅਸੀਂ ਗਾਬਾ ਵਿੱਚ ਆਪਣਾ ਰਿਕਾਰਡ ਜਾਰੀ ਰੱਖਾਂਗੇ।”
ਦੱਸਣਯੋਗ ਹੈ ਕਿ ਐਸ਼ੇਜ਼ ਸੀਰੀਜ਼ 1882 ਤੋਂ ਚੱਲ ਰਹੀ ਹੈ ਅਤੇ ਇਹ ਕ੍ਰਿਕਟ ਦੀ ਸਭ ਤੋਂ ਪੁਰਾਣੀ ਰਿਵਾਲਰੀ ਹੈ। ਭਾਰਤੀ ਫੈਨਸ ਲਈ ਇਹ ਮੈਚ ਰੋਮਾਂਚਕ ਹੋਵੇਗਾ, ਕਿਉਂਕਿ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐੱਲ) ਵਿੱਚ ਖੇਡਣ ਵਾਲੇ ਕਈ ਕ੍ਰਿਕਟਰ ਇੱਥੇ ਹੋਣਗੇ। ਮੈਚ ਨੂੰ ਭਾਰਤ ਵਿੱਚ ਸਟਾਰ ਸਪੋਰਟਸ ਅਤੇ ਹੌਟਸਟਾਰ ’ਤੇ ਲਾਈਵ ਦੇਖਿਆ ਜਾ ਸਕਦਾ ਹੈ। ਆਸਟ੍ਰੇਲੀਅਨ ਟੀਮ ਪਰਥ ਦੀ ਜਿੱਤ ਨਾਲ 1-0 ਲੀਡ ‘ਤੇ ਹੈ।
