ਪ੍ਰੋ. ਕੁਲਬੀਰ ਸਿੰਘ
ਇਕੀਗਾਈ ਬਾਰੇ ਮੈਂ ਕਾਫ਼ੀ ਵਾਰ ਕਾਫ਼ੀ ਕੁਝ ਲਿਖ ਚੁੱਕਾ ਹਾਂ। ਆਪਣੀ ਸਵੈ-ਜੀਵਨੀ ਮੀਡੀਆ ਆਲੋਚਕ ਦੀ ਆਤਮਕਥਾ ਵਿਚ ਵੀ ਇਸਦਾ ਜ਼ਿਕਰ ਕੀਤਾ ਹੈ। ਉਸ ਜ਼ਿਕਰ ਨੂੰ ਪੜ੍ਹ ਕੇ ਕਈ ਪਾਠਕਾਂ ਨੇ ਉਸ ਬਾਰੇ ਜਾਣਕਾਰੀ ਮੰਗੀ ਹੈ। ਕਈ ਦੋਸਤਾਂ-ਮਿੱਤਰਾਂ, ਰਿਸ਼ਤੇਦਾਰਾਂ ਨੂੰ ਮੈਂ ਤੋਹਫ਼ੇ ਵਜੋਂ ਭੇਂਟ ਕੀਤੀ ਹੈ। ਕਰ ਰਿਹਾ ਹਾਂ।
ਇਕੀਗਾਈ ਪੁਸਤਕ ਦੇ ਲੇਖਕਾਂ ਹੈਕਟਰ ਮਾਰਸੀਆ ਅਤੇ ਫ੍ਰਾਂਸੇਕ ਮਿਗਲੇਸ (ਅਨੁਵਾਦਕ: ਜਗਵਿੰਦਰ ਜੋਧਾ) ਨੇ ਪੁਸਤਕ ਦੇ ਅਖ਼ੀਰ ਵਿਚ ਓਕੀਨਾਵਾ ਦੇ ਲੋਕਾਂ ਦੇ ਜੀਵਨ ਤੋਂ ਸਿੱਖਿਆ ਲੈਂਦੇ ਹੋਏ 10 ਅਜਿਹੇ ਨਿਯਮਾਂ ਦੀ ਸੂਚੀ ਦਿੱਤੀ ਹੈ ਜਿਨ੍ਹਾਂ ’ਤੇ ਅਮਲ ਕਰਕੇ, ਜਿਨ੍ਹਾਂ ਨੂੰ ਅਪਣਾ ਕੇ ਸਿਹਤਮੰਦ, ਖੁਸ਼ਹਾਲ ਤੇ ਲੰਮਾ ਜੀਵਨ ਜਿਊਣ ਦੀਆਂ ਸੰਭਾਵਨਾਵਾਂ ਨੂੰ ਵਧਾਇਆ ਜਾ ਸਕਦਾ ਹੈ।
ਲੇਖਕ ਲਿਖਦੇ ਹਨ ਕਿ ਹਮੇਸ਼ਾ ਕੰਮ ਕਰਦੇ ਰਹੋ ਕਦੇ ਵੀ ਰਿਟਾਇਰ ਨਾ ਹੋਵੋ। ਕਦੇ ਵੀ ਕਾਹਲ ਨਾ ਕਰੋ, ਜਲਦਬਾਜ਼ੀ ਨਾ ਕਰੋ। ਪੇਟ ਭਰ ਕੇ ਨਾ ਖਾਓ। ਚੰਗੇ ਵਿਅਕਤੀਆਂ ਨੂੰ ਦੋਸਤ ਬਣਾਓ। ਸਿਹਤ ਨੂੰ, ਤੰਦਰੁਸਤੀ ਨੂੰ ਤਰਜੀਹ ਦਓ। ਖੁਸ਼ ਰਹੋ। ਮੁਸਕਰਾਓ। ਕੁਦਰਤ ਦੇ ਅੰਗ ਸੰਗ ਰਹੋ। ਧੰਨਵਾਦ ਕਰਦੇ ਰਹੋ। ਵਰਤਮਾਨ ਵਿਚ ਜੀਓ। ਰੋਜ਼ਾਨਾ ਦਾ ਜੀਵਨ ਦਾ ਕੋਈ ਮਕਸਦ ਮਨੋਰਥ ਮਿਥੋ ਅਤੇ ਉਸਨੂੰ ਪੂਰਾ ਕਰਨ ਲਈ ਰੁੱਝੇ ਰਹੋ।
ਇਕੀਗਾਈ ਪੁਸਤਕ ਦੁਨੀਆਂ ਦੀਆਂ 70 ਤੋਂ ਵਧੇਰੇ ਭਾਸ਼ਾਵਾਂ ਵਿਚ ਅਨੁਵਾਦ ਹੋ ਚੁੱਕੀ ਹੈ। ਹਰੇਕ ਭਾਸ਼ਾ ਦੇ ਪਾਠਕਾਂ ਨੇ ਇਸਨੂੰ ਪਸੰਦ ਕੀਤਾ ਅਤੇ ਸਰਾਹਿਆ ਹੈ।
ਹੈਕਟਰ ਗਾਰਸੀਆ ਤੇ ਫ੍ਰਾਂਸੇਸਕ ਮਿਗਲੇਸ ਕਿਤਾਬ ਦੀ ਭੂਮਿਕਾ ਵਿਚ ਲਿਖਦੇ ਹਨ, “ਜਪਾਨੀ ਲੋਕ ਹਮੇਸ਼ਾ ਰੁੱਝੇ ਰਹਿਣ ਨਾਲ ਮਿਲਣ ਵਾਲੇ ਆਨੰਦ ਨੂੰ ਇਕੀਗਾਈ ਕਹਿੰਦੇ ਹਨ। ਵਧੀਆ ਭੋਜਨ, ਗ੍ਰੀਨ ਟੀ ਅਤੇ ਚੰਗਾ ਮੌਸਮ ਲੰਮੀ ਉਮਰ ਵਿਚ ਵੱਡੀ ਭੂਮਿਕਾ ਨਿਭਾਉਂਦੇ ਹਨ।“
ਲੇਖਕਾਂ ਦਾ ਇਹ ਵੀ ਕਹਿਣਾ ਹੈ ਕਿ ਜਪਾਨ ਦਾ ਨਿੰਬੂ ਵਰਗਾ ਦਿਸਣ ਵਾਲਾ ਤੇ ਐਂਟੀਆਕਸੀਡੈਂਟ ਦੀ ਭਰਪੂਰ ਮਾਤਰਾ ਵਾਲਾ ਫ਼ਲ ਸ਼ਿਕੁਵਾਸਾ ਉਥੇ ਸੱਭ ਤੋਂ ਵੱਧ ਮਿਲਦਾ ਹੈ। ਕਿਤੇ ਇਹ ਫਲ੍ਹ ਹੀ ਇਨ੍ਹਾਂ ਦੀ ਲੰਮੀ ਉਮਰ ਦਾ ਰਾਜ਼ ਤਾਂ ਨਹੀਂ? ਉਹ ਲੋਕ ਹਰੇ ਭਰੇ ਪਹਾੜਾਂ ਉੱਤੇ ਸਾਫ਼ ਪਾਣੀ ਵਾਲੇ ਮਾਹੌਲ ਵਿਚ ਹੱਸਦੇ ਤੇ ਲਤੀਫ਼ੇ ਸੁਣਾਉਂਦੇ ਵਿਖਾਈ ਦਿੰਦੇ ਹਨ।
ਕੁਦਰਤੀ ਮਾਹੌਲ, ਵਚਿੱਤਰ ਊਰਜਾ ਅਤੇ ਉਤਸ਼ਾਹ ਕਾਰਨ ਉਹ ਲੰਮਾ ਤੇ ਖੁਸ਼ੀ ਭਰਿਆ ਜੀਵਨ ਜਿਊਂਦੇ ਹਨ। ਉਹ ਆਪਣੇ ਮਨ ਵਿਚ ਕਿਸੇ ਪ੍ਰਤੀ ਬੁਰੀ ਭਾਵਨਾ ਨਹੀਂ ਰੱਖਦੇ। ਸਾਰਿਆਂ ਨਾਲ ਭਾਈਚਾਰੇ ਵਾਲਾ ਵਿਹਾਰ ਕਰਦੇ ਹਨ। ਉਨ੍ਹਾਂ ਅੰਦਰ ਟੀਮ ਭਾਵਨਾ ਅਤੇ ਅਪਣੱਤ ਬਹੁਤ ਹੈ। ਉਹ ਹਰੇਕ ਨਾਲ ਪਿਆਰ ਨਾਲ ਪੇਸ਼ ਆਉਂਦੇ ਹਨ ਤੇ ਇਕ ਦੂਜੇ ਦੀ ਮਦਦ ਕਰਦੇ ਹਨ।
ਦੋਸਤੀ ਦੀ ਭਾਵਨਾ, ਹਲਕਾ ਭੋਜਨ, ਲੋੜੀਂਦਾ ਆਰਾਮ ਅਤੇ ਕਸਰਤ ਉਨ੍ਹਾਂ ਦੀ ਤੰਦਰੁਸਤੀ ਦੇ ਹੋਰ ਪਹਿਲੂ ਹਨ। ਇਕੀਗਾਈ ਇਨ੍ਹਾਂ ਚੋਂ ਸੱਭ ਤੋਂ ਉਪਰ ਹੈ।
ਐਨਾ ਕੁਝ ਇਸ ਛੋਟੀ ਜਿਹੀ ਕਿਤਾਬ ਵਿਚ ਕਹਿਣ ਸਮੇਟਣ ਉਪਰੰਤ ਇਨ੍ਹਾਂ ਦੋਹਾਂ ਲੇਖਕਾਂ ਨੇ ’ਇਚੀਗੋ ਇਚੀ’ (ਹਰ ਪਲ ਦਾ ਆਨੰਦ ਮਾਨਣ ਦੀ ਜਪਾਨੀ ਕਲਾ) ਆਪਣੇ ਪਾਠਕਾਂ ਸਨਮੁਖ ਪੇਸ਼ ਕੀਤੀ ਜਿਸਦਾ ਅਨੁਵਾਦ ਸੁਖਪਾਲ ਸਿੰਘ ਹੁੰਦਲ ਨੇ ਕੀਤਾ ਹੈ।
ਇਚੀਗੋ ਇਚੀ ਸਾਨੂੰ ਵਰਤਮਾਨ ਵਿਚ ਰਹਿਣ-ਜਿਊਣ ਲਈ ਪ੍ਰੇਰਿਤ ਕਰਦੀ ਹੈ। ਗੁੱਸਾ, ਉਦਾਸੀ, ਡਰ ਅਤੇ ਨਫ਼ਰਤ ਸਾਡਾ ਸੱਭ ਤੋਂ ਵੱਧ ਨੁਕਸਾਨ ਕਰਦੇ ਹਨ। ਗੁੱਸਾ ਸਾਨੂੰ ਅਤੀਤ ਨਾਲ ਬੰਨ੍ਹੀ ਰੱਖਦਾ ਹੈ। ਡਰ ਸਾਨੂੰ ਭਵਿੱਖ ਵਿਚ ਲੈ ਜਾਂਦਾ ਹੈ। ਉਦਾਸੀ ਵੀ ਸਾਨੂੰ ਅਤੀਤ ਵਿਚ ਲੈ ਜਾਂਦੀ ਹੈ। ਖੁਸ਼ੀ ਸਮੇਂ ਅਸੀਂ ਦੂਸਰਿਆਂ ਨਾਲ ਜੁੜਦੇ ਹਾਂ। ਉਨ੍ਹਾਂ ਨੂੰ ਦੱਸਦੇ ਹਾਂ। ਇੰਝ ਅਸੀਂ ਵਰਤਮਾਨ ਵਿਚ ਜਿਊਂਦੇ ਹਾਂ। ਵਰਤਮਾਨ ਵਿਚ ਆ ਜਾਂਦੇ ਹਾਂ। ਵਰਤਮਾਨ ਵਿਚ ਜਿੳਣਾ, ਵਰਤਮਾਨ ਵਿਚ ਰਹਿਣਾ, ਵਰਤਮਾਨ ਵਿਚ ਵਾਪਿਸ ਆ ਜਾਣਾ ਮਹੱਤਵਪੂਰਨ ਹੈ। ਇਹੀ ਇਚੀਗੋ ਇਚੀ ਹੈ। ਹੁਣ ਦੇ, ਵਰਤਮਾਨ ਦੇ ਪਲ ਨੂੰ ਮਾਨਣਾ।
ਵਰਤਮਾਨ ਵਿਚ ਜਿਊਣ ਲਈ, ਹੁਣ ਦੇ ਪਲ ਦਾ ਆਨੰਦ ਉਠਾਉਣ ਲਈ ਸਾਨੂੰ ਆਲੇ ਦੁਆਲੇ ਨਾਲ ਜੁੜਨ, ਆਪਣੇ ਕੰਮ ਵਿਚ ਰੁੱਝੇ ਰਹਿਣ ਦੀ ਲੋੜ ਹੈ।
ਇਚੀਗੋ ਇਚੀ ਦੇ ਲੇਖਕਾਂ ਨੇ ਪੁਸਤਕ ਦੇ ਅਖ਼ੀਰ ਵਿਚ ਹੁਣ ਦੇ ਪਲਾਂ ਨੂੰ ਮਾਣਨ ਲਈ, ਵਰਤਮਾਨ ਵਿਚ ਜਿਊਣ ਲਈ 10 ਸਿਧਾਂਤ ਪੇਸ਼ ਕੀਤੇ ਹਨ। ਇਹ ਇਕ ਤਰ੍ਹਾਂ ਇਸ ਪੁਸਤਕ ਦਾ ਸਾਰ ਹਨ। ਹੈਕਟਰ ਗਾਰਸ਼ੀਆ ਅਤੇ ਫ਼੍ਰਾਂਸੇਕ ਮਿਗਲੇਸ ਲਿਖਦੇ ਹਨ ਕਿ ਵਿਸ਼ੇਸ਼ ਮੌਕਿਆਂ ਨੂੰ ਕਦੇ ਮੁਲਤਵੀ ਨਾ ਕਰੋ। ਇਸ ਤਰ੍ਹਾਂ ਜੀਓ ਕਿ ਜਿਵੇਂ ਇਹ ਤੁਹਾਡੇ ਜੀਵਨ ਵਿਚ ਇਕ ਵਾਰ ਹੀ ਵਾਪਰਨ ਵਾਲਾ ਹੈ। ਹਮੇਸ਼ਾ ਵਰਤਮਾਨ ਵਿਚ ਜੀਓ। ਕੁਝ ਨਾ ਕੁਝ ਨਵਾਂ ਸਿੱਖਦੇ ਰਹੋ। ਕਾਹਲ ਅਤੇ ਭੱਜ ਦੌੜ ਤੋਂ ਪਰੇ ਧਿਆਨ ਲਗਾਉਣ ਦਾ ਅਭਿਆਸ ਕਰੋ। ਪੰਜ ਸੰਵੇਦਨਾਵਾਂ ਸੁਣਨ, ਵੇਖਣ, ਛੂਹਣ, ਚੱਖਣ ਅਤੇ ਸੁੰਘਣ ਦੀ ਕਲਾ ਸਿੱਖੋ। ਵੱਡੇ ਮੌਕਿਆਂ ਦੀ ਉਡੀਕ ਵਿਚ ਛੋਟੀਆਂ ਛੋਟੀਆਂ ਖੁਸ਼ੀਆਂ ਨਾ ਗਵਾਓ। ਹਰੇਕ ਇਕੱਤਰਤਾ ਨੂੰ ਪਾਰਟੀ ਬਣਾਓ।
ਹੋਰ ਸਮਝਾਉਂਦੇ ਹੋਏ ਲੇਖਕ ਲਿਖਦੇ ਹਨ ਕਿ ਵਰਤਮਾਨ ਨੂੰ ਬਿਹਤਰ ਢੰਗ ਨਾਲ ਬਤੀਤ ਕਰਨ ਲਈ, ਸਾਰਥਿਕ ਤੇ ਆਨੰਦਦਾਇਕ ਬਨਾਉਣ ਲਈ ਚੰਗੀ ਸੰਗਤ, ਜਸ਼ਨ, ਭਰਪੂਰ ਮਾਨਸਿਕਤਾ ਤੇ ਪ੍ਰੇਰਨਾਦਾਇਕ ਮਾਹੌਲ ਵਿਚ ਰਹੋ।
ਦੋਵੇਂ ਪੁਸਤਕਾਂ ਵਾਰ ਵਾਰ ਪੜ੍ਹਨ ਯੋਗ ਹਨ। ਸੰਭਾਲਣ ਯੋਗ ਹਨ। ਤੋਹਫ਼ੇ ਵਜੋਂ ਭੇਂਟ ਕਰਨ ਯੋਗ ਹਨ। ਦੁਨੀਆਂ ਦੇ ਕਰੋੜਾਂ ਪਾਠਕ ਇਨ੍ਹਾਂ ਨੂੰ ਆਪਣੀ ਆਪਣੀ ਭਾਸ਼ਾ ਵਿਚ ਪੜ੍ਹ ਚੁੱਕੇ ਹਨ। ਜਿਵੇਂ ਜਿਵੇਂ ਇਹ ਹੋਰ ਹੋਰ ਭਾਸ਼ਾਵਾਂ ਵਿਚ ਅਨੁਵਾਦ ਹੁੰਦੀਆਂ ਜਾਣਗੀਆਂ ਤਿਵੇਂ ਤਿਵੇਂ ਇਨ੍ਹਾਂ ਦਾ ਪਾਠਕ-ਦਾਇਰਾ ਹੋਰ ਹੋਰ ਮੋਕਲਾ ਹੁੰਦਾ ਜਾਵੇਗਾ। ਤਿਵੇਂ ਤਿਵੇਂ ਇਹ ਹੋਰ ਹੋਰ ਲੋਕਾਂ ਦੀਆਂ ਨਿੱਜੀ ਲਾਇਬਰਰੀਆਂ ਦਾ ਸ਼ਿੰਗਾਰ ਬਣਦੀਆਂ ਜਾਣਗੀਆਂ।
