(ਔਕਲੈਂਡ) 05 ਫਰਵਰੀ, 2023: (23 ਮਾਘ, ਨਾਨਕਸ਼ਾਹੀ ਸੰਮਤ 554):-ਅੱਜ ਸ੍ਰੀ ਗੁਰੂ ਰਵਿਦਾਸ ਜੀ ਦੇ 646ਵੇਂ ਪ੍ਰਕਾਸ਼ ਉਤਸਵ ਨੂੰ ਸਮਰਪਿਤ ਸਮਾਗਮਾਂ ਦੀ ਲੜੀ ਦਾ ਆਖਰੀ ਪ੍ਰੋਗਰਾਮ ਗੁਰਦੁਆਰਾ ਸ੍ਰੀ ਗੁਰੂ ਰਵਿਦਾਸ ਸਭਾ ਬੰਬੇ ਹਿੱਲ ਵਿਖੇ ਸੰਪੂਰਨ ਹੋਇਆ। ਨਿਸ਼ਾਨ ਸਾਹਿਬ ਦੀ ਸੇਵਾ ਕੀਤੀ ਗਈ।
ਸ੍ਰੀ ਅਖੰਠ ਪਾਠ ਸਾਹਿਬ ਦੇ ਭੋਗ ਉਪਰੰਤ ਸਜੇ ਕੀਰਤਨ ਦੀਵਾਨ ਦੇ ਵਿਚ ਭਾਈ ਲਾਲ ਸਿੰਘ ਦੇ ਜੱਥੇ ਨੇ ਸ਼ਬਦ ਕੀਰਤਨ ਨਾਲ ਹਾਜ਼ਰੀ ਲਗਵਾਈ ਹੈ। ਢਾਡੀ ਜੱਥਾ ਭਾਈ ਕਸ਼ਮੀਰ ਸਿੰਘ ਕਾਦਰ ਜੋ ਕਿ ਟੋਰੰਗਾ ਸਿਟੀ ਵਿਖੇ ਗੁਰਦੁਆਰਾ ਸਿੱਖ ਸੰਗਤ ਪਹੁੰਚੇ ਹੋਏ ਹਨ, ਵੀ ਆਪਣੇ ਜੱਥੇ ਸਮੇਤ ਪੌਣੇ ਘੰਟੇ ਲਈ ਸੰਗਤਾਂ ਨੂੰ ਢਾਡੀ ਵਾਰਾਂ ਦੇ ਨਾਲ ਜੋੜ ਗਏ। ਢਾਡੀ ਜੱਥੇ ਦੀਆਂ ਵਾਰਾਂ ਨੂੰ ਸੰਗਤ ਵੱਲੋਂ ਖੂਬ ਸਰਾਹਿਆ ਗਿਆ। ਉਨ੍ਹਾਂ ਸ੍ਰੀ ਗੁਰੂ ਰਵਿਦਾਸ ਜੀ ਦੇ ਜੀਵਨ ਪ੍ਰਸੰਗ ਸਬੰਧੀ ਬਹੁਤ ਹੀ ਸੁੰਦਰ ਗਾਥਾਵਾਂ ਸੁਣਾਈਆਂ। ਸਟੇਜ ਸੰਚਾਲਨ ਸਕੱਤਰ ਅਵਤਾਰ ਸਿੰਘ ਹੋਰਾਂ ਨੇ ਕੀਤਾ। ਭਾਈ ਮਲਕੀਤ ਸਿੰਘ ਸਹੋਤਾ ਹੋਰਾਂ ਅਤੇ ਕਾਕਾ ਰੋਹਿਨ ਮਹੇ ਨੇ ਇਕ-ਇਕ ਸ਼ਬਦ ਸਰਵਣ ਕਰਵਾਇਆ। ਗੁਰਦੁਆਰਾ ਸਾਹਿਬ ਵੱਲੋਂ ਸੇਵਾਦਾਰਾਂ ਨੂੰ ਸਨਮਾਨਿਤ ਵੀ ਕੀਤਾ ਗਿਆ ਜਿਸ ਵਿਚ ਸ੍ਰੀ ਲਾਲ ਚੰਦ, ਸ੍ਰੀਮਤੀ ਸੁਰਜੀਤ ਕੌਰ, ਸੁਰਿੰਦਰ ਕੌਰ ਭੱਟੀ, ਸੁਰਜੀਤ ਕੌਰ, ਹਰਭਜਨ ਢੰਡਾ, ਜਤਿੰਦਰ ਢੰਡਾ, ਅਮਰਜੀਤ ਬੰਗੜ, ਸ੍ਰੀ ਲੰਕੇਸ਼ ਸਹਿਗਲ ਚੰਡੀਗੜ੍ਹ, ਕੁਲਜੀਤ ਸਿੰਘ, ਮੋਹਿੰਦਰ ਪਾਲ, ਸ੍ਰੀ ਰੇਸ਼ਮ ਕਰੀਮਪੁਰੀ, ਪਰਮਜੀਤ ਬਿਰਦੀ ਅਤੇ ਹੋਰ ਸੇਵਾਦਾਰਾਂ ਨੂੰ ਸਨਮਾਨਿਤ ਕੀਤਾ ਗਿਆ। ਪ੍ਰਸਿੱਧ ਕਵੀ ਸ. ਹਰਗੋਬਿੰਦ ਸਿੰਘ ਸ਼ੇਖੂਪੁਰੀਆ ਦੀ ਕਿਤਾਬ ਗੁਰਦੁਆਰਾ ਸਾਹਿਬ ਦੀ ਲਾਇਬ੍ਰੇਰੀ ਨੂੰ ਭੇਟ ਕੀਤੀ ਗਈ। ਅੱਜ ਦੇ ਪ੍ਰੋਗਾਮ ਦੇ ਵਿਚ ਭਾਰੀ ਗਿਣਤੀ ਦੇ ਵਿਚ ਸੰਗਤ ਜੁੜੀ। ਕਾਰ ਪਾਰਕਿੰਗ ਦੇ ਵਿਚ ਪੂਰੀ ਥਾਂ ਭਰ ਗਈ ਸੀ, ਅਤੇ ਕਾਰਾਂ ਬਾਹਰਲੀ ਸੜਕ ਉਤੇ ਲਗਾਉਣੀਆ ਪਈਆਂ । ਪਾਪਾਕੁਰਾ ਤੋਂ ਸਾਂਸਦੀ ਜੂਠਿਥ ਕੌਲਿਨ ਅਤੇ ਸਾਬਕਾ ਸਾਂਸਦ ਸ. ਕੰਵਲਜੀਤ ਸਿੰਘ ਬਖਸ਼ੀ ਵੀ ਪਹੁੰਚੇ। ਪ੍ਰਧਾਨ ਰਾਮ ਸਿੰਘ ਚੌਕੜੀਆ ਅਤੇ ਕਮੇਟੀ ਵੱਲੋਂ ਕੁੱਝ ਸ਼ਖ਼ਸੀਅਤਾ ਨੂੰ ਗੁਰੂ ਘਰ ਵਿਖੇ ਸੇਵਾਵਾਂ ਦੇਣ ਲਈ ਸਿਰੋਪਾਉ ਨਾਲ ਸਨਮਾਨਿਤ ਕੀਤਾ ਗਿਆ। ਸ੍ਰੀ ਪਰਮਜੀਤ ਮਹਿਮੀ, ਹੰਸ ਰਾਜ ਕਟਾਰੀਆ ਵਾਈਸ ਸਕੱਤਰ ਜਨਰਲ, ਪ੍ਰਸਿੱਧ ਕਵੀ ਸ. ਗੁਰਿੰਦਰ ਸਿੰਘ ਜੀ, ਸ. ਨਰਿੰਦਰ ਸਹੋਤਾ ਅਤੇ ਸ. ਕਰਮਜੀਤ ਸਿੰਘ ਤਲਵਾਰ ਨੇ ਗੁਰੂ ਸਾਹਿਬ ਦੇ ਜੀਵਨ ਉੱਪਰ ਆਪਣੇ ਵਿਚਾਰ ਸਾਂਝੇ ਕੀਤੇ। ਸਰਬੱਤ ਦੇ ਭਲੇ ਲਈ ਅਰਦਾਸ ਕੀਤੀ ਗਈ ਉਪਰੰਤ ਗੁਰੂ ਕੇ ਲੰਗਰ ਅਤੁੱਟ ਵਰਤਾਏ ਗਏ। ਪ੍ਰਧਾਨ ਰਾਮ ਸਿੰਘ ਚੌਕੜੀਆ ਅਤੇ ਸਮੂਹ ਪ੍ਰਬੰਧਕ ਕਮੇਟੀ ਵੱਲੋਂ ਆਈਆਂ ਸੰਗਤਾਂ ਨੂੰ ਜੀ ਆਇਆਂ ਆਖਿਆ ਗਿਆ, ਲੰਗਰ ਹਾਲ ਅਤੇ ਰਸੋਈ ਘਰ ਵਿੱਚ ਸੇਵਾਵਾਂ ਨਿਭਾ ਰਹੇ ਮਹਿਲਾਵਾਂ ਅਤੇ ਸੇਵਾਦਾਰ ਮੈਂਬਰਸ ਦਾ ਵਿਸ਼ੇਸ਼ ਤੌਰ ਤੇ ਧੰਨਵਾਦ ਕੀਤਾ ਗਿਆ। ਸਕੱਤਰ ਸਾਹਿਬ ਵਲੋਂ ਰਹਿ ਗਈਆਂ ਕਮੀਆਂ ਲਈ ਸੰਗਤ ਤੋਂ ਖਿਮਾਂ ਯਾਚਿਕਾ ਮੰਗੀ ਗਈ। ਗੁਰੂ ਕੇ ਲੰਗਰ ਵਿਚ ਬਹੁਤ ਸਾਰੀਆਂ ਵੰਨਗੀਆਂ ਖਿੱਚ ਦਾ ਕੇਂਦਰ ਬਣੀਆਂ ਰਹੀਆਂ।