Australia NZ | Punjabi Akhbar | Punjabi Newspaper Online Australia

ਪ੍ਰਦਰਸ਼ਨਕਾਰੀਆਂ ‘ਸ਼ਰਮ ਕਰੋ’ ਦੇ ਨਾਅਰਿਆਂ ਨਾਲ ਸਰਕਾਰ ਨੂੰ ਭੰਡਿਆ (ਬ੍ਰਿਸਬੇਨ) ਇੱਥੇ 26 ਜਨਵਰੀ ਨੂੰ ਸੰਘੀ ਅਤੇ ਸੂਬਾ ਸਰਕਾਰਾਂ ਵੱਲੋਂ ਦੇਸ਼ ਭਰ ਵਿੱਚ ‘ਆਸਟਰੇਲੀਆ ਡੇਅ’ ਨੂੰ ਸਮਰਪਿਤ ਰਾਜਸੀ ਸਮਾਗਮ ਸਨਮਾਨਾਂ ਨਾਲ ਕਰਵਾਏ ਗਏ ਉੱਥੇ ਆਸਟਰੇਲੀਆ ਦੇ ਬਹੁਤੇ ਸ਼ਹਿਰਾਂ ‘ਚ ਹਜ਼ਾਰਾਂ ਲੋਕਾਂ ਨੇ ਵੱਡੀਆਂ ਰੈਲੀਆਂ ਅਤੇ ਇਕੱਤਰਤਾ ਕਰਕੇ ਸਰਕਾਰਾਂ ਪ੍ਰਤੀ ਵਿਰੋਧ ਦਰਜ ਕੀਤਾ। ਪੁਲੀਸ ਦੀ ਮੌਜੂਦਗੀ ਵਿੱਚ ਹਜ਼ਾਰਾਂ ਲੋਕਾਂ ਨੇ ਸਿਡਨੀ, ਮੈਲਬਾਰਨ, ਕੈਨਬਰਾ, ਗੋਲਡ ਕੋਸਟ, ਬ੍ਰਿਸਬੇਨ ਆਦਿ ਸ਼ਹਿਰਾਂ ਦੇ ਧੁਰ ਅੰਦਰ ਸ਼ਾਂਤਮਈ ਵਿਰੋਧ ਪ੍ਰਦਰਸ਼ਨਾਂ ਰਾਹੀਂਇਸ ਦਿਨ ਨੂੰ ਆਸਟਰੇਲੀਆ ਲਈ ‘ਸੋਗ ਦਾ ਦਿਨ’, ‘ਸਰਵਾਈਵਲ ਡੇ’ ਜਾਂ ‘ਇਨਵੈਸ਼ਨ ਡੇਅ’ ਬਿਆਨਿਆ। ਬੁਲਾਰਿਆਂ ਨੇ ਆਪਣੇ ਸਾਂਝੇ ਸੰਦੇਸ਼ ‘ਚ ਕਿਹਾ ਕਿ ਇਹ ਵਰਤਾਰਾ ਮਨੁੱਖਤਾ ਵਿਰੋਧੀ ਹੈ ਕਿ ਸਰਕਾਰਾਂ ਸਾਨੂੰ ਸਾਡੀ ਨਸਲਕੁਸ਼ੀ ਦਾ ਜਸ਼ਨ ਮਨਾਉਣ ਲਈ ਹਰ ਸਾਲ ਪ੍ਰੇਰਦੀਆਂ ਹਨ। ਉਹਨਾਂ ਕਿਹਾ ਕਿ ਬ੍ਰਿਟਿਸ਼ ਨੇ ਸਾਡੀ ਕੌਮ ਦਾ ਘਾਣ, ਔਰਤਾਂ ਨਾਲ ਬਲਾਤਕਾਰ, ਸਾਡੇ ਬੱਚਿਆਂ ਦੀ ਚੋਰੀ, ਸਾਡੀਆਂ ਜ਼ਮੀਨਾਂ ਅਤੇ ਦਰਿਆਵਾਂ ਨੂੰ ਜ਼ਹਿਰੀਲਾ ਕਰਨਾ, ਸਾਡੀਆਂ ਭਾਸ਼ਾਵਾਂ ਦੀ ਹੋਂਦ ਨੂੰ ਮਿਟਾਉਣ ਆਦਿ ਵਰਗੇ ਘਿਨਾਉਣੇ ਕਾਰਨਾਮਿਆਂ ਤੋਂ ਬਾਅਦ ਇਸ ਦਿਨ 1788 ਈਸਵੀ ਨੂੰ ਸਾਨੂੰ ਬਸਤੀ ਬਣਾ ਸਿਡਨੀ ਕੋਵ ਵਿਖੇ ਆਪਣਾ ਬ੍ਰਿਟਿਸ਼ ਝੰਡਾ ਲਹਿਰਾਇਆ ਸੀ। ਇਹ ਬਸਤੀਵਾਦ ਨੀਤੀ ਤਹਿਤ ਸਾਡੀ ਅਸਲ ਗੁਲਾਮੀ ਦੀ ਸ਼ੁਰੂਆਤ ਸੀ। ਇਸ ਲਈ ਹਰ ਆਸਟਰੇਲੀਅਨ ਲਈ ਇਹ ਦਿਹਾੜਾ ਮਾਣ ਨਾ ਹੋ ਕੇ ਕਲੰਕ ਮਾਤਰ ਹੈ। ਅਸੀਂ ਸਾਰੇ ਅੱਜ ਇੱਥੇ ਆ ਕੇ ਮਾਣ ਮਹਿਸੂਸ ਕਰਦੇ ਹਾਂ ਪਰ ਫਿਰ ਵੀ ਇਹ ਜਾਣ ਕੇ ਦੁਖੀ ਹਾਂ ਕਿ ਸਾਨੂੰ ਅੱਜ ਵੀ ਇੱਥੇ ਕਿਉਂ ਖੜ੍ਹਾ ਹੋਣਾ ਪੈ ਰਿਹਾ ਹੈ? ਬੁਲਾਰਿਆਂ ਨੇ ਸਰਕਾਰ ਤੋਂ ਆਸਟਰੇਲੀਆ ਦਿਵਸ ਦੀ ਮਿਤੀ ਨੂੰ 26 ਜਨਵਰੀ ਤੋਂ ਬਦਲਣ ਦੀ ਮੰਗ ਵੀ ਕੀਤੀ। ਭਾਵੁਕ ਪ੍ਰਦਰਸ਼ਨਕਾਰੀਆਂ ਨੇ ‘ਸ਼ਰਮ ਕਰੋ’ ਦੇ ਨਾਅਰੇ ਲਗਾਏ ਅਤੇ ਕਿਹਾ ਕਿ ਉਸ ਸਮੇਂ ਬਹੁਤ ਸਾਰੇ ਸਵਦੇਸ਼ੀ ਲੋਕ ਜਾਂ ਤਾਂ ਜੇਲ੍ਹਾਂ ਵਿੱਚ ਸਨ, ਜਾਂ ਇੱਕ ‘ਟੁੱਟੀ’ ਕਾਨੂੰਨੀ ਪ੍ਰਣਾਲੀ ਵਿੱਚ ਫਸ ਗਏ ਸਨ। ਸਾਨੂੰ ਇਨਸਾਫ਼ ਨਹੀਂ ਮਿਲਿਆ। ਦੱਸਣਯੋਗ ਹੈ ਕਿ ਸਮੂਹ ਭਾਰਤੀਆਂ ਨੇ ਭਾਰਤੀ ਗਣਤੰਤਰ ਦਿਵਸ ਨੂੰ ਮਨਾਉਂਦਿਆਂ ਹੋਇਆਂ ਇਹਨਾਂ ਵਿਰੋਧ ਰੈਲੀਆਂ ‘ਚ ਹਿੱਸਾ ਲਿਆ ਅਤੇ ਹਾਅ ਦਾ ਨਾਅਰਾ ਮਾਰਿਆ।

Australia NZ