ਬਠਿੰਡਾ, 26 ਅਪਰੈਲ, ਬਲਵਿੰਦਰ ਸਿੰਘ ਭੁੱਲਰ
ਪੰਜਾਬੀ ਸਾਹਿਤ ਸਭਾ ਰਜਿ: ਬਠਿੰਡਾ ਵੱਲੋਂ ਸਥਾਨਕ ਟੀਚਰਜ਼ ਹੋਮ ਵਿਖੇ ਪ੍ਰਵਾਸ਼ੀ ਸਾਹਿਤਕਾਰ ਇੰਦਰਜੀਤ ਪੁਰੇਵਾਲ ਦਾ ਰੂਬਰੂ ਅਤੇ ਆਗ਼ਾਜ਼ਬੀਰ ਦਾ ਕਹਾਣੀ ਸੰਗ੍ਰਹਿ ‘ਕੁਈਨਜ਼ਲੈਂਡ’ ਰਿਲੀਜ਼ ਸਮਾਗਮ ਕਰਵਾਇਆ ਗਿਆ। ਸਮਾਗਮ ਦੇ ਪ੍ਰਧਾਨਗੀ ਮੰਡਲ ਵਿੱਚ ਡਾ: ਲਾਭ ਸਿੰਘ ਖੀਵਾ, ਇੰਦਰਜੀਤ ਪੁਰੇਵਾਲ, ਬੂਟਾ ਸਿੰਘ ਚੌਹਾਨ, ਐੱਚ ਐੱਸ ਡਿੰਪਲ ਅਤੇ ਜਸਪਾਲ ਮਾਨਖੇੜਾ ਸ਼ਾਮਲ ਹੋਏ। ਧਰਮਿੰਦਰ ਸਿੰਘ ਔਖਲ ਤੇ ਜਗਮੇਲ ਸਿੰਘ ਸਿੱਧੂ ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਹਾਜ਼ਰੀ ਭਰੀ।
ਸਮਾਗਮ ਦੀ ਸੁਰੂਆਤ ਸਭਾ ਦੇ ਪ੍ਰਧਾਨ ਜਸਪਾਲ ਮਾਨਖੇੜਾ ਨੇ ਸਮੂੰਹ ਹਾਜ਼ਰੀਨ ਨੂੰ ਜੀ ਆਇਆਂ ਕਹਿੰਦਿਆਂ ਕੀਤੀ। ਉਹਨਾਂ ਇਸ ਪ੍ਰੋਗਰਾਮ ਦੀ ਰੂਪ ਰੇਖਾ ਤੇ ਵੀ ਚਾਨਣਾ ਪਾਇਆ। ਇਸ ਉਪਰੰਤ ਸੰਬੋਧਨ ਕਰਦਿਆਂ ਸਾਹਿਤ ਅਕਾਦਮੀ ਦਿੱਲੀ ਦੇ ਗਵਰਨਿੰਗ ਕੌਂਸਲ ਦੇ ਮੈਂਬਰ ਬੂਟਾ ਸਿੰਘ ਚੌਹਾਨ ਨੇ ਕਿਹਾ ਕਿ ਉਹ ਕੌਂਸਲ ਦੇ ਮੈਂਬਰ ਵਜੋਂ ਸਾਹਿਤਕ ਇਨਾਮਾਂ ਵਿੱਚ ਪਾਰਦਰਸ਼ਤਾ ਦੇ ਹਾਮੀ ਹਨ ਤੇ ਇਸ ਕਾਰਜ ਤੇ ਸੁਹਿਰਦਤਾ ਨਾਲ ਪਹਿਰਾ ਦੇਣ ਦਾ ਯਤਨ ਕਰਨਗੇ। ਉਹਨਾਂ ਵਿਸਵਾਸ਼ ਦਿਵਾਇਆ ਕਿ ਅਕਾਦਮੀ ਵੱਲੋਂ ਸਾਹਿਤ ਸਭਾਵਾਂ ਵੱਲੋਂ ਕੀਤੀਆਂ ਜਾਂਦੀਆਂ ਸਾਹਿਤਕ ਗਤੀਵਿਧੀਆਂ ਨਹੀ ਸਮਰੱਥਾ ਅਨੁਸਾਰ ਮੱਦਦ ਕੀਤੀ ਜਾਵੇਗੀ। ਰਾਗ ਕਾਫ਼ਲੇ ਬਾਰੇ ਧਰਮਿੰਦਰ ਔਲਖ ਤੇ ਜਸਵਿੰਦਰ ਰੱਤੀਆਂ ਨੇ ਕਿਹਾ ਕਿ ਕੁਝ ਸਮਾਂ ਪਹਿਲਾਂ ਸ੍ਰੀ ਪੁਰੇਵਾਲ ਵੱਲੋਂ ਲਾਇਆ ਇਹ ਬੂਟਾ ਹੁਣ ਰੁੱਖ ਬਣ ਗਿਆ ਹੈ ਅਤੇ ਰਾਗ ਮੈਗਜੀਨ ਨੇ ਸਾਹਿਤ ਜਗਤ ਵਿੱਚ ਆਪਣੀ ਨਿਵੇਕਲੀ ਥਾਂ ਬਣਾ ਲਈ ਹੈ। ਸ੍ਰੀ ਐੱਚ ਐੱਸ ਡਿੰਪਲ ਨੇ ਪੁਸਤਕ ਕੁਈਨਜ਼ਲੈਂਡ ਉੱਪਰ ਆਪਣੇ ਆਲੋਚਨਾਤਮਕ ਵਿਚਾਰ ਪੇਸ ਕੀਤੇ।
ਸਮਾਗਮ ਦੇ ਕੇਂਦਰ ਬਿੰਦੂ ਸ੍ਰੀ ਇੰਦਰਜੀਤ ਪੁਰੇਵਾਲ ਨੇ ਆਪਣੇ ਪਿੰਡ ਤੋਂ ਅਮਰੀਕਾ ਤੱਕ ਦੇ ਸਫ਼ਰ ਦੀ ਸਾਂਝ ਪਾਉਂਦਿਆਂ ਦੱਸਿਆ ਕਿ ਉਸਦਾ ਮਾਂ ਬੋਲੀ ਦੀ ਸੇਵਾ ਕਰਨ ਦਾ ਸੁਫ਼ਨਾ ਹਕੀਕਤ ਵਿੱਚ ਬਦਲ ਗਿਆ ਹੈ। ਉਹਨਾਂ ਆਪਣੇ ਸਾਹਿਤਕ ਜੀਵਨ ਬਾਰੇ ਖੁਲ ਕੇ ਵਿਚਾਰਾਂ ਕੀਤੀਆਂ। ਸੁਆਲਾਂ ਦੇ ਜਵਾਬ ਦਿੰਦਿਆਂ ਉਹਨਾਂ ਅਸਲ ਸਾਹਿਤ ਉਹ ਹੁੰਦਾ ਹੈ, ਜੋ ਪਾਠਕ ਨੂੰ ਰਸਤਾ ਵਿਖਾਉਂਦਾ ਹੈ। ਉਹਨਾਂ ਸਾਹਿਤਕਾਰਾਂ ਨੂੰ ਮਿਆਰੀ ਸਾਹਿਤ ਰਚਨ ਦਾ ਸੁਝਾਅ ਦਿੱਤਾ। ਪ੍ਰਧਾਨਗੀ ਭਾਸ਼ਣ ’ਚ ਡਾ: ਲਾਭ ਸਿੰਘ ਖੀਵਾ ਨੇ ਜਿੱਥੇ ਸਾਹਿਤ ਸਭਾ ਤੇ ਮੈਗਜ਼ੀਨ ਦੇ ਪ੍ਰਬੰਧਕਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਪਹਿਲਕਦਮੀਆਂ ਦੀ ਸ਼ਲਾਘਾ ਕੀਤੀ, ਉੱਥੇ ਸਾਹਿਤਕ ਸਮਾਗਮਾਂ ਵਿੱਚ ਘਟ ਰਹੀ ਹਾਜ਼ਰੀ ਤੇ ਵੀ ਚਿੰਤਾ ਪ੍ਰਗਟ ਕੀਤੀ। ਉਹਨਾਂ ਬੁਧੀਜੀਵੀਆਂ ਨੂੰ ਸੁਝਾਅ ਦਿੱਤਾ ਕਿ ਸਿਰ ਜੋੜ ਕੇ ਬੈਠਣ ਅਤੇ ਸਾਹਿਤ ਤੇ ਸਮਾਜ ਨੂੰ ਦੁਪੇਸ਼ ਮੁਸਕਿਲਾਂ ਦਾ ਹੱਲ ਲੱਭਣ।
ਸਮਾਗਮ ਦੌਰਾਨ ਮਨਜੀਤ ਬਠਿੰਡਾ, ਲਛਮਣ ਦਾਸ ਮੁਸਾਫਿਰ, ਅਮਰਜੀਤ ਜੀਤ, ਇਕਬਾਲ ਫਕੀਰਾ, ਦਿਲਬਾਗ ਸਿੰਘ, ਅਮਿ੍ਰਤ ਕਲੇਰ, ਮਨਜੀਤ ਜੀਤ, ਅਮਨ ਦਾਤੇਵਾਸੀਆਂ ਨੇ ਆਪਣੇ ਕਲਾਮ ਸੁਣਾ ਕੇ ਮਹੌਲ ਨੂੰ ਰੰਗੀਨ ਬਣਾਇਆ। ਟੀਚਰਜ ਹੋਮ ਟਰੱਸਟ ਦੇ ਜਨਰਲ ਸਕੱਤਰ ਲਛਮਣ ਮਲੂਕਾ ਨੇ ਸਭਨਾ ਦਾ ਧੰਨਵਾਦ ਕੀਤਾ। ਸਟੇਜ ਸਕੱਤਰ ਦੀ ਭੂਮਿਕਾ ਅਮਨ ਦਾਤੇਵਾਸੀਆ ਨੇ ਬਾਖੂਬੀ ਨਿਭਾਈ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸਰਵ ਸ੍ਰੀ ਗੁਰਦੇਵ ਖੋਖਰ, ਅਤਰਜੀਤ ਕਹਾਣੀਕਾਰ, ਰਣਬੀਰ ਰਾਣਾ, ਜਸਵਿੰਦਰ ਜੱਸ, ਪਿ੍ਰ: ਜਸਵੀਰ ਸਿੰਘ ਢਿੱਲੋਂ, ਡਾ: ਅਜੀਤਪਾਲ, ਸੁਖਦਰਸ਼ਨ ਗਰਗ, ਤਰਸੇਮ ਬਸ਼ਰ ਆਦਿ ਵੀ ਹਾਜ਼ਰ ਸਨ।