ਸਮਾਗਮਾਂ ਵਿੱਚ ਹਜ਼ਾਰਾਂ ਲੋਕਾਂ ਨੇ ਆਤਿਸ਼ਬਾਜ਼ੀ ਦਾ ਆਨੰਦ ਮਾਣਿਆ
(ਹਰਜੀਤ ਲਸਾੜਾ, ਬ੍ਰਿਸਬੇਨ 1 ਜਨਵਰੀ) ਨਵੇਂ ਸਾਲ 2024 ਦੀ ਪੂਰਵ ਸੰਧਿਆ ‘ਤੇ ਆਸਟਰੇਲੀਆ ਦੇ ਵੱਖ ਵੱਖ ਸ਼ਹਿਰਾਂ ਵਿੱਚ ਜਸ਼ਨ ਮਨਾਏ ਗਏ। ਸੂਬਾ ਕੂਇਨਜ਼ਲੈਂਡ ਦੇ ਸ਼ਹਿਰ ਬ੍ਰਿਸਬੇਨ ਦੇ ਸਾਊਥ ਬੈਂਕ ਇਲਾਕੇ ਵਿੱਚ ਤਕਰੀਬਨ 85,000 ਤੋਂ ਵੱਧ ਲੋਕਾਂ ਦੀ ਭੀੜ ਨੇ ਚਮਕਦਾਰ ਆਤਿਸ਼ਬਾਜ਼ੀ ਦੇ ਪ੍ਰਦਰਸ਼ਨ ਨਾਲ 2023 ਨੂੰ ਵਿਦਾਇਗੀ ਦਿੱਤੀ। ਕੇਨਜ਼ ਦੇ ਉੱਤਰ ਤੋਂ ਲੈ ਕੇ ਗੋਲਡ ਕੋਸਟ ਸ਼ਹਿਰ ਤੱਕ ਪੂਰੀ ਰਾਤ 105 ਤੋਂ ਵੱਧ ਆਤਿਸ਼ਬਾਜ਼ੀ ਦੇ ਪ੍ਰਦਰਸ਼ਨ ਹੋਏ। ਸਿਡਨੀ ਦੇ ਓਪੇਰਾ ਹਾਊਸ ਦੀਆਂ ਪੌੜੀਆਂ ‘ਤੇ ਰਾਤ ਨੂੰ ਆਤਿਸ਼ਬਾਜ਼ੀ ਦੇ ਪ੍ਰਦਰਸ਼ਨ ਨੂੰ ਦੇਖਣ ਲਈ ਹਜ਼ਾਰਾਂ ਲੋਕ ਸਵੇਰ ਤੋਂ ਪਹੁੰਚੇ ਹੋਏ ਸਨ। ਡਮੈਲਬਾਰਨ ਵਿੱਚ ਨਵੇਂ ਸਾਲ ਦੀ ਸ਼ਾਮ ਨੂੰ ਉਤਸ਼ਾਹੀ ਲੋਕਾਂ ਨੇ ਐਤਵਾਰ ਦੁਪਹਿਰ ਨੂੰ ਯਾਰਾ ਨਦੀ ਦੇ ਕੰਢੇ ਵੱਡੇ ਇਕੱਠ ਕੀਤੇ। ਫੁਟਸਕ੍ਰੇ ਵਿੱਚ ਸ਼ੁਰੂਆਤੀ ਆਤਿਸ਼ਬਾਜ਼ੀ ਦੇ ਪ੍ਰਦਰਸ਼ਨਾਂ ਨੂੰ ਦੇਖਣ ਲਈ ਹਜ਼ਾਰਾਂ ਹੋਰ ਇਕੱਠੇ ਹੋਏ, ਜਿੱਥੇ ਪੌਪ ਬੈਂਡ ਰੈਗਰਜੀਟੇਟਰ ਨੇ ਵੀ ਭੀੜ ਦਾ ਮਨੋਰੰਜਨ ਕੀਤਾ। ਰਾਜਧਾਨੀ ਕੈਨਬਰਾ ‘ਚ ਹਜ਼ਾਰਾਂ ਲੋਕ ਬਰਲੇ ਗ੍ਰਿਫਿਨ ਝੀਲ ਦੇ ਆਲੇ ਦੁਆਲੇ ਨਵੇਂ ਸਾਲ ਦੇ ਸਵਾਗਤ ਲਈ ਇਕੱਠੇ ਹੋਏ। ਇੱਥੇ ਪੰਦਰਾਂ ਮਿੰਟ ਦੀ ਆਤਿਸ਼ਬਾਜ਼ੀ ਦੀ ਪ੍ਰਦਰਸ਼ਨੀ ਲੇਕ ਬਰਲੇ ਗ੍ਰਿਫਿਨ ਅਤੇ ਕਾਮਨਵੈਲਥ ਐਵੇਨਿਊ ਬ੍ਰਿਜ ਦੇ ਕੇਂਦਰੀ ਬੇਸਿਨ ਤੋਂ ਸ਼ੁਰੂ ਕੀਤੀ ਗਈ।
ਹੋਬਾਰਟ ਵਿੱਚ ਵੀ ਭਾਰੀ ਇਕੱਠ ਨੇ ਗਰਮੀਆਂ ਦੇ ਤਿਉਹਾਰ ਦੇ ਸੁਆਦ ਲਈ ਵਾਟਰਫਰੰਟ ਵੱਲ ਰੁਖ ਕੀਤਾ। ਐਡੀਲੇਡ ਵਿੱਚ ਨਵੇਂ ਸਾਲ ਦੀ ਸ਼ਾਮ ਨੂੰ ਮਨਾਉਣ ਵਾਲੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਐਡੀਲੇਡ ਦੇ ਸੀਬੀਡੀ ਨੇੜੇ ਐਲਡਰ ਪਾਰਕ ਵਿੱਚ ਪਹੁੰਚੇ। ਕੋਵਿਡ-19 ਮਹਾਂਮਾਰੀ ਤੋਂ ਬਾਅਦ ਇਹ ਪਹਿਲੀ ਵਾਰ ਸੀ ਕਿ ਟੋਰੇਨਸ/ਕੈਰਾਵੀਰਾ ਪੈਰੀ ਨਦੀ ਦੇ ਕਿਨਾਰੇ ਮੁਫ਼ਤ ਆਤਿਸ਼ਬਾਜ਼ੀ ਦਾ ਆਯੋਜਨ ਕੀਤਾ ਗਿਆ ਸੀ। ਡਾਰਵਿਨ ਵਿੱਚ ਬਹੁਤ ਗਰਮੀ ਦੇ ਬਾਵਜੂਦ ਹਜ਼ਾਰਾਂ ਲੋਕਾਂ ਨੇ ਟਾਪ ਐਂਡ ਵਿੱਚ ਡਾਰਵਿਨ ਵਾਟਰਫਰੰਟ ਵਿਖੇ ਨਵੇਂ ਸਾਲ ਨੂੰ ਦੀ ਆਇਆਂ ਕਿਹਾ। ਪਰਥ ਵਿਖੇ ਆਤਿਸ਼ਬਾਜ਼ੀ ਦੇਖਣ ਲਈ ਦੁਪਹਿਰ ਤੋਂ ਬਾਅਦ ਸ਼ਹਿਰ, ਬੀਚਾਂ ਅਤੇ ਪਰਥ ਦੇ ਸਮੁੰਦਰੀ ਕੰਢੇ ਦੇ ਨਾਲ-ਨਾਲ ਵੱਡੀ ਭੀੜ ਦੇਖਣ ਨੂੰ ਮਿਲੀ।