__ਕਮਿਊਨਿਟੀ ਸ਼ੋਕ ਸਮਾਚਾਰ

NZ PIC 5 Feb-1

ਔਕਲੈਂਡ 5 ਫਰਵਰੀ  (ਹਰਜਿੰਦਰ ਸਿੰਘ ਬਸਿਆਲਾ)- ਉਪਰ ਉਠਦੀਆਂ ਸਮੁੰਦਰੀ ਲਹਿਰਾਂ ਦੇ ਨਾਲ ਅਠਖੇਲੀਆਂ ਕਦੋਂ ਤੁਹਾਡੇ ਜੀਵਨ ਨੂੰ ਸਾਂਤ ਕਰ ਦੇਣ, ਕੁਝ ਨਹੀਂ ਕਿਹਾ ਜਾ ਸਕਦਾ ਹੈ। ਬੀਤੇ ਕੱਲ੍ਹ ਔਕਲੈਂਡ ਤੋਂ ਲਗਪਗ 85 ਕਿਲੋਮੀਟਰ ਦੂਰ ਇਕ ਛੋਟੇ ਜਿਹੇ ਟਾਪੂ ‘ਗੋਟ ਆਈਲੈਂਡ’ ਵਿਖੇ ਜਿਸ ਵਿਅਕਤੀ ਦੀ ਡੁੱਬਣ ਨਾਲ ਮੌਤ ਹੋਈ ਹੈ, ਉਸ ਬਾਰੇ ਜਾਣਕਾਰੀ ਮਿਲੀ ਹੈ ਕਿ ਉਹ ਲਕਸ਼ਮੀ ਵਿਹਾਰ, ਮੋਹਨ ਗਾਰਡਨ, ਨਵੀਂ ਦਿੱਲੀ ਨਾਲ ਸਬੰਧਿਤ 30 ਸਾਲਾ ਪਾਰੁਸ਼ ਕੈਂਥ ਹੈ। ਉਸਨੇ ਬੀਤੀ 28 ਜਨਵਰੀ ਨੂੰ ਹੀ ਇਥੇ ਆਪਣਾ ਜਨਮ ਦਿਨ ਮਨਾਇਆ ਸੀ। ਇਹ ਘਟਨਾ ਕੱਲ੍ਹ ਸ਼ਾਮ 3.40 ਮਿੰਟ ਦੀ ਹੈ। ਪੁਲਿਸ ਨੂੰ ਸੂਚਨਾ ਮਿਲਣ ‘ਤੇ ਉਸਨੂੰ ਮੁੱਢਲੀ ਸਹਾਇਤਾ ਦਿੱਤੀ ਗਈ, ਨਕਲੀ ਸਾਹ ਦਿੱਤਾ ਗਿਆ ਅਤੇ ਹੈਲੀਕਾਪਟਰ ਦੇ ਰਾਹੀਂ ਹਸਪਤਾਲ ਪਹੁੰਚਾਇਆ ਗਿਆ, ਵੈਂਟੀਲੇਟਰ ਵੀ ਵਰਤਿਆ ਗਿਆ ਪਰ ਉਹ ਬੀਤੀ ਰਾਤ ਸਾਹ ਛੱਡ ਗਿਆ। ਡਾਕਟਰਾਂ ਅਨੁਸਾਰ ਉਸਦੇ ਅੰਦਰ ਕਾਫੀ ਪਾਣੀ ਚਲਾ ਗਿਆ ਸੀ। ਇਹ ਨੌਜਵਾਨ ਕੁਝ ਸਮੇਂ ਤੋਂ ਇਥੇ ਵਰਕ ਵੀਜ਼ੇ ਉਤੇ ਰਹਿ ਰਿਹਾ ਸੀ ਤੇ ਇਸ ਵੇਲੇ ਹੈਲਰਟਾਊ ਬ੍ਰੀਓਵੇਰੀ ਰੈਸਟੋਰੈਂਟ  ਉਤੇ ਸ਼ੈਫ ਵਜੋਂ ਕੰਮ ਕਰਦਾ ਸੀ ਅਤੇ ਇਸ ਤੋਂ ਪਹਿਲਾਂ ਉਹ ‘ਲੀ ਮੈਰਡੀਅਨ’ ਅਤੇ ‘ਸੂਰਿਆ’ ਨਵੀਂ ਦਿੱਲੀ ਵਿਖੇ ਵੀ ਸ਼ੈਫ ਵਜੋਂ ਕੰਮ ਕਰ ਚੁੱਕਾ ਹੈ। ਨਿਊਜ਼ੀਲੈਂਡ ਦੇ ਵਿਚ ਵੀ ਉਸਨੇ ਕੁੱਕਰੀ ਦਾ ਡਿਪਲੋਮਾ ਕੀਤਾ ਸੀ। ਪੰਜਾਬੀ ਮੂਲ ਦੇ ਇਸ ਨੌਜਵਾਨ ਦੀ ਮਾਤਾ ਦਾ ਨਾਂਅ ਸ੍ਰੀਮਤੀ ਰੀਤਾ ਕੈਂਥ ਹੈ ਅਤੇ ਉਸਦੇ ਪਿਤਾ ਦਾ ਨਾਂਅ ਪ੍ਰੇਮ ਪ੍ਰਕਾਸ਼ ਕੈਂਥ ਹੈ। ਇਸਦਾ ਇਕ ਛੋਟਾ ਭਰਾ ਹੈ। ਪਰਿਵਾਰ ਦੀ ਆਰਥਿਕ ਹਾਲਤ ਵੀ ਦਰਮਿਆਨੀ ਹੈ ਅਤੇ ਇਹ ਨੌਜਵਾਨ ਹੀ ਘਰ ਦਾ ਖਰਚਾ ਚਲਾ ਰਿਹਾ ਸੀ। ਉਸਦੇ ਕੁਝ ਪਰਿਵਾਰਕ ਮੈਂਬਰਾਂ ਨੇ ਸ. ਖੜਗ ਸਿੰਘ ਅਤੇ ਸ੍ਰੀ ਭਵਦੀਪ ਸਿੰਘ ਢਿੱਲੋਂ  (ਆਨਰੇਰੀ ਕਾਉਂਸਲ ਆਫ ਆਕਲੈਂਡ) ਦੇ ਨਾਲ ਸੰਪਰਕ ਕੀਤਾ ਹੈ ਤਾਂ ਕਿ ਮ੍ਰਿਤਕ ਸਰੀਰ ਇੰਡੀਆ ਭੇਜਿਆ ਜਾ ਸਕੇ। ਇਸ ਨੌਜਵਾਨ ਦੀ ਮੌਤ ਦੇ ਸੋਗ ਵਜੋਂ ਉਸਦੇ ਰੈਸਟੋਰੈਂਟ ਵਾਲਿਆਂ ਨੇ ਵੀ ਇਕ ਦਿਨ ਲਈ ਆਪਣਾ ਬਿਜ਼ਨਸ ਬੰਦ ਕੀਤਾ ਹੈ।